Komunidade Suku Ahik no Laline asesu hikas enerjia eletrisidade
VIKEKE, 05 Agostu 2026 (TATOLI)—Xefe Suku Ahik, Postu Administrativu Lakluta, Munisípiu Vikeke, Ercílio Soares, hateten normaliza ona enerjia eletrisidade iha Suku Ahik no Laline hafoin avaria durante fulan hirak liubá.
“Durante fulan hirak nia laran ne’e ami-nia liña eletrisidade husi Kribas, Manatutu, avaria. Nune’e, la fornese enerjia ba ami. Ami túr iha nakukun iha sede suku. Ita halo karta ruma mós ladi’ak tanba eletrisidade la lakan. Foin lakan filafali semana rua liubá. Ami sente di’ak uitoan ona,” Ercílio Soares ba TATOLI iha Postu Vikeke Vila, Kuarta ne’e.
Notísia relevante: Liña eletrisidade iha Suku Ahik Avaria fulan lima ona
Nia haktuir antes ne’e eletrisidade avaria kauza husi klima (udan), entaun foin lalais udan para ne’e mak parte téknika Eletricidade de Timor-Leste, Empreza Públika (EDTL, E. P.) normaliza fali elerisidade ne’ebé avaria ne’e.
“Tanba liña aat iha ema-nia área, entaun tékniku parte Manatutu mak responsabiliza halo normalizasaun,” nia haktuir.
Tuir Ercílio katak eletrisidade atu labele avaria tékniku EDTL sira tenke kontrola másima, para iha avaria ruma hadi’a tutuir kedas, labele lori fulan mak foin hadi’a.
Tuir dadus, populasaun asesu eletrisidade husi Suku Ahik ho totál uma-kain hamutuk 450 no Suku Laline uma-kain hamutuk 155.
Jornalista: Vitorino Lopes da Costa
Editór: Xisto Freitas da Piedade
