TL-Austrália kompromete hasa’e númeru 10.000 ba traballadór timoroan to’o 2028
DILI, 05 Agostu 2026 (TATOLI)—Embaixadora Timor-Leste iha Austrália, Inês Maria de Almeida, aprezenta kona-ba programa Pacific Australian Labour Mobility Partnership (PALM), ne’ebé dedika ba partisipasaun traballadór timoroan sira no ninia perspetiva dezenvolvimentu iha futuru.
Aprezentasaun ne’e subliña importánsia PALM nu’udar instrumentu hodi kria oportunidade empregu, dezenvolve kompeténsia profisionál no hametin relasaun kooperasaun entre Timor-Leste no Austrália.
Iha kooperasaun bilateral ne’e, Timor-Leste no Austrália iha kompromisu atu hasa’e númeru 10.000 ba traballadór timoroan sira-ne’ebé integra iha programa PALM to’o tinan 2028.
Sekretáriu Estadu Komunikasaun Sosiál, Expedito Dias Ximenes, hateten ohin Embaixadora Timor-Leste ba Austrália aprezenta kona-ba dezafiu ne’ebé traballadór timoroan hasoru liuhusi programa PALM.
“Entaun, ohin, orgaun diplomata ne’e aprezenta ninia esforsu oinsá hodi bele salva guarda direitu traballadór timoroan sira iha Austrália ne’ebé viola husi empregadór sira,” Expedito Dias Ximenes hateten ba jornalista sira iha nia kna’ar fatin, Palásiu Governu, ohin.
Nia hatutan, katak Austrália hakarak aumenta númeru traballadór timoroan tamba traballadór sira-ne’e servisu badinas liu kompara ho nasaun sira seluk.
Iha reuniaun ne’e nia aprezenta mós dadus kona-ba partisipasaun traballadór timoroan sira iha Programa PALM, nune’e mós kestaun no keixa prinsipál sira-ne’ebé relata kona-ba kondisaun traballu no bem-estar nian.
Nune’e iha aprezentasaun ne’e identifika dezafiu sira-ne’ebé sei kontinua iha implementasaun programa liuliu iha área protesaun direitu traballadór sira nian, reforsu koordenasaun institusionál no valoriza kompeténsia sira ne’ebé hetan, no subliña mós benefísiu sira-ne’ebé PALM fó ba ekonomia australiana, hodi responde ba nesesidade forsa traballu iha setór atividade oioin.
Aleinde destaka mós importánsia atu kle’an liután kooperasaun bilaterál hodi garante kondisaun traballu ne’ebé justu no hasa’e benefísiu ekonómiku no sosiál husi programa ba nasaun rua ne’e.
Konsellu Ministru toma mós koñesimentu ba rekomendasaun balun hodi hametin pozisaun Timor-Leste iha ámbitu Programa PALM, inklui hametin koordenasaun entre instituisaun nasionál sira, valoriza kompeténsia ne’ebé traballadór sira hetan iha rai-li’ur.
Diversifika oportunidade empregu iha setór atividade foun no promove abordajen nasionál koordenada iha relasaun ho autoridade australiana sira, ho objetivu atu asegura katak programa ne’e kontinua dezenvolve tuir prinsípiu parseria ne’ebé fó benefísiu ba malu.
Jornalista : Alexandra da Costa
Editór : Cancio Ximenes
