DIM Expo 2026 sai alvu atu envolve povu liuliu juventude
DILI, 06 Agostu 2026 (TATOLI)—Prezidente Repúblika, José Ramos-Horta, hamutuk ho entidade relevante sira halo abertura ba Dili Internasionál Maratona (DIM) EXPO 2026 no konsidera eventu ne’ebé sai alvu atu envolve povu liuliu juventude sira.
Eventu Dili Internasionál Maratona Expo 2026 ne’e ho tema “Hadomi ita-nia ai-laran no balada fuik sira”, kompostu husi kategória oioin hanesan ba labarik sira iha kilómetru 10, fun run (5km), half marathon (21.1 km) no full marathon (42.195 km).
Iha abertura ne’e, Prezidente Repúblika José Ramos-Horta hateten ohin hahú maratona klase internasionál ida, iha atleta maratona barak mai diretamente husi Austrália, Xina no mós husi nasaun Ázia seluk.
“Nune’e, ha’u hato’o boas-vindas ba ema hotu ne’ebé mai partisipa tanba ho imi-nia prezensa hanesan atleta, família, vizitante no turista,” Xefe estadu hateten liuhusi diskursu iha serimónia abertura Dili Internasionál Maratona 2026 iha Palásiu Prezidensiál Nicolau Lobato, Bairru Pite, ohin.
Xefe Estadu dehan, dezde nia simu kna’ar hanesan Prezidente Repúblika, nia la autoriza seguransa lori ho kilat tama iha área Prezidénsia nia laran tanba odamatan sei nakloke nafatin ba ema hotu liuliu ba labarik sira.
“Ita iha mini zoo ida, ne’ebé seidauk boot, atu sai fatin edukasaun ba labarik sira no ba povu. Iha mós eskola espesiál ida ba labarik sira-ne’ebé ramata ona eskola loro-loron. Sira bele ba iha ne’ebá atu aprende lian estranjeiru, múzika, komputadór, servisu manuál no atividade seluk tan,” nia dehan.
Aleinde ne’e, nia dehan, iha mós dapur ida iha kotuk ne’ebé naran Cantina Matak (Cantina Verde), ne’ebé ema hotu bele ba han no loro-loron sira fornese hahán ba labarik hamutuk 300 to’o 400 no Prezidénsia mós fornese hahán ba ema hamutuk 600 to’o 700 iha fatin seluk sira. Entaun ida-ne’e de’it parte ki’ik ida husi esforsu atu tau matan ba labarik sira.
“Governu rasik iha programa hahán loro-loron ba estudante hotu iha nasaun. Iha labarik eskola liu 400.000 iha Timor-Leste no loro-loron sira tenke simu hahán nutritivu atu ajuda sira-nia moris-di’ak no kresimentu,” nia dehan.
“Ami organiza atividade oioin durante tinan tomak hanesan maratona, meia maratona no atividade desportiva seluk, tanba ami organiza atividade barak durante tinan tomak atu envolve povu liuliu juventude,” nia hateten.
Tanba ne’e, nia hato’o agradesimentu ba patrisinadór sira, parséria dezenvolvimentu, Governu no mós partisipante sira.
Enkuantu iha seremónia abertura ne’e grupu 20 husi Ministériu Turizmu no Ambiente (MTA) halo aprezentasaun festivál gastronómia no divertimentu.
Jornalista : Alexandra da Costa
Editór : Cancio Ximenes
