Komunidade Nahareka-Ossú ke’e hetan mina iha mota Uaileu

VIKEKE,  06  Agostu  2026 (TATOLI)—Komunidade husi Aldeia Makabu’u, Suku Nahareka, Postu Administrativu Ossú, Munisípiu Vikeke, ke’e hetan mina-matan ida iha mota Uaileu, área Depalasi.

Xefe Aldeia Makabu’u, Nazário S. Fernandes, haktuir iha Tersa (04/08) komunidade husi Aldeia Makabu’u bá mota Uaileu, bee ne’ebé nalihun iha mota laran kór difirente loos ho bee, entaun komunidade komesa buka tuir mak sira  ke’e rai besik mota ninin, ke’e rai la naruk sira hetan kedas mina nune’e sira horon ba iis sai hanesan loos minarai.

“Nune’e ita-nia komunidade sira kuru sai hodi koko, sunu duni iha mota ninin lakan loos. Tan ne’e, mak ohin ha’u-nia komunidade sira aprezenta ba suku no konsellu suku tún direta ba haree mina-matan ne’ebé ita-nia komunidade ke’e hetan,” Nazário S. Fernandes ba TATOLI, iha Postu Administrativu Ossú, Kinta ne’e.

Maibé, nia  dehan, karik ida-ne’e mina-rai presiza parte relevante sira mai foti amostra (sampel) ruma hodi teste tanba komunidade mós seidauk hatene loos katak ida-ne’e mina ka lae.

“Ha’u sente ida-ne’e presiza diresaun relevante sira tenke mai foti amostra ruma para bá halo teste. Karik ida-ne’e mina duni tenke asegura tanba ne’e rikusoin nasaun nian,” nia informa.

Iha fatin hanesan, Xefe Suku Nahareka, José Martins S. Lopes, hateten loos duni komunidade Makabu’u ke’e hetan mina nune’e parte autoridade husi Suku Nahareka apela ba komunidade atu labele sunu ahi besik iha mina-matan.

“Mina-matan ne’ebé ita-nia komunidade ke’e hetan ne’e, ohin ami haree direta ona no ita-nia komunidade kuru jerigen litru ida no aqua boot ida, maibé mosu nafatin. Hafoin ami haree tiha mina-matan ne’e ha’u husu kedas ba komunidade labele sunu ahi. Ami bandu kualker sidadaun se de’it mak mosu iha mina-matan tenke fó koñesimentu uluk ba autoridade suku, depoiz ba haree mina-matan,” nia tenik.

Nia dehan durante ne’e hanesan Suku Nahareka-oan nunka rona katak mina-matan iha Suku Nahareka, agora daudaun  mak foin hetan mina-matan ida iha Suku Nahareka, ida-ne’e sai hanesan grasa-boot ida bá Suku Nahareka.

“Tan ne’e, ami husu ba parte relevante sira tau-atensaun ba mina-matan ne’ebé iha Suku Nahareka, tanba ne’e sai hanesan rikusoin nasaun Timor-Leste nian. Ami mós husu parte Autoridade Nasionál Petróoliu (ANP) mai haree hodi halo teste, atu ita bele hatene loloos mina referidu. Kona-ba-mina-matan ne’e foin mak ita-nia komunidade hetan ne’ebé ami mós seidauk informa ba parte ANP, maibé liuhusi mídia sira bele nota hodi tau ba konsiderasaun,” nia akresenta.

Jornalista: Vitorino Lopes da Costa

Editór: Xisto Freitas da Piedade