Membru KPK na’in-40 simu pose iha Tirilolo
BAUKAU, 06 Agostu 2026 (TATOLI)—Membru Konsellu Polisiamentu Komunitáriu (KPK) hamutuk na’in-40 simu pose iha Suku Tirilolo, Postu Administrativu Baukau Vila, Kinta ne’e.
Xefe Suku Tirilolo atuál Koordenadór KPK, Elvino Freitas Belo, esplika membru hirak-ne’e simu pose hafoin tuir formasaun husi formadór lideradu Komandu Polísia Nasionál Timor-Leste (PNTL) Baukau durante loron-tolu iha-ne’ebé sei garante seguransa iha Suku Tirilolo.
“Agradese ba formadór sira tanba enserra no fó pose ba membru KPK no futuru bele garante estabilidade iha suku,” Elvino Belo hateten iha ninia kna’ar fatin.
Líder Tirilolo ne’e kompromete futuru KPK halo kooperasaun ho Ofisiál Polísia Suku (OPS), Konsellu Suku no juventude hanesan mantein liña komunikasaun tuir papél liuliu prevene konflitu iha área jurídika Suku Tirilolo.
Aleinde ne’e, nafatin husu apoia ba parte seguransa PNTL no parseiru dezenvolvimentu sira hanesan planu asaun KPK nian liuhusi aprovasaun iha reuniaun Konsellu Suku.
“Husu membru KPK sira atu futuru mantein kooperasaun nune’e ita hamutuk kombate krime iha ita-nia suku,” Elvino Belo komenta.
Iha fatin hanesan, Komadante PNTL Baukau, Superintendente Xefe João Sancho Pires hateten objetivu reativa hikas KPK iha suku atu garante estabilidade iha suku no jeralmente iha Baukau.
Superintendente Xefe Pires konta KPK hahú ativa iha tinan 2005, 2017 no 2021 maibé tanba situasaun Pandemia COVID-19 paradu no hahú fali reativa iha 2025 maibé hahú iha Postu Administrativu Venilale no tinan-ne’e kontinua iha postu seluk ne’ebé seidauk hanesan postu Baukau Vila.
“Serbisu importante ne’ebé KPK tenke halo mak identifika problema hanesan asuntu sosiál, veteranu, kazu sivíl no krime,” Superintendente Xefe Pires hateten.
Pires hato’o mensajen ba membru KPK sira atu kontinua komunika no koordena ho membru OPS bainhira iha indísiu problema nune’e hamutuk prevene dezestabilidade iha suku no munisípiu.
Entretantu, membru KPK iha Suku Tirilolo hamutuk na’in-40 ne’ebé maihusi estrutura suku, funsionáriu, juventude feto-mane, inan-aman ne’ebé sei koloka iha aldeia neen ho totál populasaun hamutuk 7.277 husi xefe família 1.702.
Papél no servisu KPK kolabora ho PNTL no Ofisiál Polísia Suku (OPS) hodi rezolve problema lokál, eduka komunidade no joven sira atu hela iha dame no labele envolve iha krime, fasilita seguransa no fahe informasaun iha baze fazeadamente.
Jornalista: Natalino Belo
Editór: Xisto Freitas da Piedade
