MS prepara postu médiku ualu no field ospitál ida iha Maratona Internasionál Dili

DILI, 06 Agostu 2026 (TATOLI)-Vise-Ministru Saúde ba Asuntu Fortalesimentu Institusionál Saúde, José dos Reis Magno, informa katak preparasaun Ministériu Saúde (MS) nian ba eventu Maratona Internasionál Dili (DIM, sigla portugés) mak halo asisténsia médika durante atividade ne’e la’o.

Ministériu Saúde sei prepara postu médiku ualu no field ospitál ida ne’ebé sei tau iha Palásiu Prezidénsial Bairru Pité.

Postu médiku ualu ne’e sei estabelese iha Embaixada Xina, Palásiu Governu, Ponte B.J Habibie, Metiaut, Areia Branka, otél JL Word, Parke Kristu Rei, no Dolokoan no destaka mós pesoál saúde no ekipamentu médiku.

“Husu ba públiku durante eventu ne’e karik nesesita hakabesik an ba postu sira, tanba iha ne’ebá ita koloka kedas médiku no ambulánsia móvel”, José dos Reis Magno hatete iha Programa Entrevista Eskluziva ne’ebé hala’o iha Faról, Dili.

Nia dehan iha field ospitál ne’e rasik sei iha médiku husi Brigada Kubanu sira, no ita-nia espesialista balun hamutuk na’in-sanulu-resin. “Sei iha ita-nia espesialista na’in-rua ka tolu hanesan emerjensista, kardilojista, no kada postu ne’e ita sei koloka ema na’in-lima, médiku ida, enfermajen rua no voluntáriu rua nomós apoiu husi CVTL”, nia dehan.

Ba eventu ne’e, MS mós apoia ambulánsia neen, iha ne’ebé rua akompaña diretamente iha terrenu no restu hein iha postu no field ospitál no iha ospitál mós nafatin preparadu.

“Nune’e, ita-nia atleta halai mak buat ruma, ita preparadu hodi atende sira. Ita mós destaka pesoál médiku sira iha otél sira ne’ebé atleta sira hela to’o atleta sira filafali. Ita koloka pesoál na’in-lima halo vijilánsia”, katak.

Preprasaun ba eventu ne’e, MS no Komisaun Eventu Korrida Maratona Internasionál Dili halo beibeik enkontru, tanba ida-ne’e mós hanesan konfiansa ida ba MS.

“Ami espera atividade ne’e bele la’o ho di’ak, nune’e labele prejudika ita-nia atleta sira to’o hotu”, nia konklui.

Jornalista: Arminda Fonseca

Editora: Maria Auxiliadora