APORTIL kontribui $514.469,16 ba kofre Estadu iha triemstre daruak
DILI, 07 Agostu 2026 (TATOLI)—Diretora Administrasaun no Finansa, Francisca Brites, infroma iha triemstre daruak hahú husi Janeiru to’o Juñu 2026 ne’e APORTIL kontribui reseita $514.469,16 ba kofre Estadu, maibé reseita menus tanba afeta husi konstrusaun Sentru Konvensaun Internasionál (CCI, sigla inglés) no Drainajen D4.
Reseita ne’e APORTIL rekolla husi fonte reseita mak hanesan ró ahi hetan $133.46, ro Yacth hamutuk $47.88, ró besi ka mina hamutuk $133.989,35, ro privadu Succes hamutuk $21.230,74, Ró Berlin Nakroma $228.992,00, Ró Berlin Ramelau $75.300,00, armajen deskobertu $5.730,00, armajen kobertu $5.000,00, estasionamentu veíkulu $18.154,70 no faan bee $4.735,00.
Fonte seluk tan mak husi armajen kobertu (fó fatin aluga halo eventu), armejen deskobertu (fó espasu armajen ba instituisaun seluk rai sira-nia materiál, distribuisaun ne’ebá ró seluk ne’ebé presiza no ida seluk mak husi estasionamentu veíkulu.
“Reseita ne’ebé boot liu mak kobre husi operasaun ró pasajeiru Berlin Nakroma, enkuantu Berlin Ramelau ladún barak tanba foin fila husi manutensaun iha Surabaya-Indonézia, entaun Berlin Nakroma mak substitui hela operasaun Berlin Ramelau nian,” Diretora ne’e infroma ba Agência Tatoli iha nia kna’ar fatin Kuarantena Tasi-Tolu, ohin.
Nia hatutan, hahú husi fulan-Maiu nia laran reseita menus tanba atividade barak mak paradu hanesan estasionamentu, fatin aluga ba eventu, fatin armajen aluga ba materiál, ró seluk atu atraka, tanba espasu APORTIL nian uza ba prosesu konstrusaun ICC no drainajen 4D, entaun APORTIL nia área deskoberta labele fó ema aluga tamba fatin afetadu hotu.
“Maske nune’e ami sei esforsu hodi rekolla reseita tuir tarjetu millaun $1 ba kada tinan, tanba iha tinan kotuk ami konsege rekolla reseita hamutuk millaun $1-resin,” nia dehan.
Nia deklara, APORTIL muda sira-nia edifísiu ba karantina Tasi-Tolu maibé kona-ba kontrolasaun no seguransa operasaun ró nian ne’e, sira destaka ekipa tékniku sira inklui destaka mós ekipa faan billete ró iha Portu Dili.
Iha fatin hanesan, tuir Vogál II ba asuntu Administrasaun no Finansa, Leandro Sena, hateten APORTIL aleinde rekolla reseita no sira mós halo atendimentu públiku liuhusi ró pasajeiru, entaun reseita ne’ebé sira rekolla diariamente ne’e husi ró privadu Succes ne’ebé kada fulan sempre selu rihun $3-resin.
“Servisu APORTIL iha tinan ida-ne’e afetadu husi konstrusaun ICC nian, entaun espasu ne’ebé sira uza ba halo atividade portuáriu nian liuliu impaktu ba atividade atu rekolla reseita,” nia hateten.
Nia dehan, espasu sira-ne’ebé uluk fó aluga ba eventu sira kuaze paradu dezde tinan 2025 bainhira Governu halo projetu konstrusaun drainajen D4.
“Espasu terminál ba ró atu atraka mós kloot tebes no estasionamentu agora labele utiliza tanba espasu kloot. Entaun, reseita menus tanba la’ós ami mak la servisu maibé espasu ne’ebé utiliza hodi rekolla reseita mak afetadu tiha hotu husi projetu ICC no drainajen D4,” nia hateten.
Nia hatutan, maske APORTIL simu pedidu barak husi ró kruzeiru sira-ne’ebé hakarak atu atraka iha portu Dili, maibé sira seidauk autoriza tanba espasu la sufisiente ba ró sira atu atraka.
“Maibé semana oin ró kruzeiru biblioteka ida sei mai atraka iha portu Dili tanba ne’e sira sei koordena ho kompañia ba kontrusaun ICC hodi fó espasu ró atu atraka no vizitante sira atu ba vizita,” nia dehan.
Jornalista : Alexandra da Costa
Editór : Cancio Ximenes
