Governu lansa Programa Suku Dijitál iha Hohorai, Mantutu
MANATUTU, 07 Agostu 2026 (TATOLI) – Governu, liuhusi Sekretaria Estadu Komunikasaun Sosiál (SEKOMS), hamutuk ho autoridade lokál, ohin, lansa Programa Suku Dijitál iha Suku Hohorai, Postu Administrativu Lakló, Munisípiu Manatutu, ho objetivu atu hasa’e asesu komunidade ba informasaun kredível no moderniza servisu públiku iha nível suku.
Sekretáriu Estadu Komunikasaun Sosiál, Expedito Dias Ximenes, hatete katak programa ida-ne’e hahú iha Oitavu Governu Konstitusionál ho naran Naroman ba Suku. Iha IX Governu Konstitusionál, programa ne’e kontinua ho naran Sentru Informasaun Suku, ne’ebé agora dezenvolve ba Plataforma Suku Dijitál.
Tuir nia, plataforma ne’e fasilita komunidade asesu diretamente ba website suku nian atu hetan informasaun kona-ba programa governamentál, atividade lokál no progresu dezenvolvimentu, liuhusi telemóvel Android, sein presiza ba rona avizu iha sede suku.
“Liuhosi plataforma ne’e, Governu hakarak promove transparénsia, promove potensia lokál, no hadi’ak atendimentu públiku to’o nivel suku no fó sai informasaun kona-ba potensia lokál, kultura, no dezenvolvimentu suku nia ba komunidade sira,” hateten SEKOMS Expedito Dias Ximenes ba jornalista sira iha Suku Hohorai, Sesta ne’e.
Expedito agradese ba Xefe Suku Hohorai ba nia inisiativa hodi submete proposta ba SEKOMS, ne’ebé ikusmai permite programa ne’e bele implementa iha suku refere.
“Agradese ba Xefe Suku Hohorai nia esforsu tomak hodi bele realiza Programa Suku Dijitál iha Suku ne’e hodi fasilita komunidade fasil atu hetan informasaun atualizada ne’ebé kredível husi Governu lokál, nasionál, internasionál, inklui husi suku laran,” dehan Expedito.
Xefe Suku Hohorai, António Nunes Soares, hato’o agradesimentu ba Governu liuhusi SEKOMS ba implementasaun Programa Suku Dijitál no promete sei utiliza plataforma ne’e atu fahe informasaun ba komunidade.
“Marka istória ba ami nia suku tanba liuhosi Plataforma Suku Dijitál ida ne’e bele fasilita komunidade sira hetan informasaun, hasa’e transparénsia no hadi’a servisu públiku liuhosi Suku Dijitál ho pakote rede internet Starlink ne’ebé lalais,” dehan António.
Nia salient katak Programa Suku Dijitál sai ponte importante ida atu hakbesik Governu ba povu, hafasil komunikasaun entre autoridade suku no komunidade, no fó oportunidade ba juventude no sidadaun sira atu aprende no uza teknolojia ba dezenvolvimentu suku.
“Hau konvida komunidade iha Suku Hohorai ne’ebé kompostu husi aldeia Hatuermera, Mirihun, Hatuanahun no Anitolau mai ita hamutuk monitoriza iha nÍvel suku hodi hasa’e komunidade nia asesu informasaun kredível liuhosi program dijitál ne’e,” nia konklui.
Suku Hohorai kompostu husi aldeia haat — Hatuermera, Mirihun, Hatuanahun no Anitolau — ho populasaun hamutuk ema 1.549 no uma-kain 356.
Jornalista: Camilio de Sousa
Editór: Filomeno Martins
