La’o Hamutuk defende diversifikasaun ekonómika ho prioridade ba setór agrikultura
DILI, 07 Agostu 2026 (TATOLI) – Organizasaun Naun-Governamentál (NGO) La’o Hamutuk no Prezidente Repúblika, José Ramos-Horta, ohin diskute kona-ba dependénsia Timor-Leste nian ba protudu importadu durante dékada rua ne’e.
Koordenadora La’o Hamutuk, Marta da Silva, hateten enkontru ho Xefe Estadu ne’e, La’o Hamutuk fahe peskiza sira ne’ebé hala’o iha terrenu no presiza iha asaun no estratéjia atu haree seguransa ai-han no setór agrikultura, ne’ebé sai preokupasaun Estadu nian oinsá atu ultrapasa hodi redús importasaun.
“Ami mós husu ba Prezidente bele hadi’a meiu transparénsia no akuntabilidade ba ezekusaun, inklui elaborasaun orsamentu ba tinan oin foti prioridade liuliu iha setór agrikultura”, nia hateten hafoin retama sorumutu iha Palásiu Prezidensiál Bairru Pite, sesta-feira ne’e.
Tuir nia, dversifikasaun ekonomíka barak, maibé hakarak diversifikasaun ida ne’ebé ba liu iha setór agrikultura, peska, pekuária, turizmu ne’ebé sustentavel liu duké investe iha indústria estrativa sira, maski iha retornu maibé la renovavel.
“Ami hanoin ne’e bele ajuda liu ita-nia ekonomia rai-laran. Durante ne’e ita depende liu ba Fundu Petróleu no [agora] kampu balun la funsiona ona”, dehan.
Durante diskusaun ne’e ko’alia mekanizmu ba agrikultura, irrigasaun no seguransa ai-han no tuir Prezidente, atu muda mekanizmu liuliu atu diversifika ai-han la’ós foku ba foos de’it maibé ba fehuk, talas no ai-han nutritivu seluk.
Marta rekomenda atu fó prioridade ba kapitál umanu liuhusi edukasaun, saúde, hodi lori moris di’ak ba povu. Tanba, país sai ona membru Assosiasaun Nasaun Sudeste Aziátiku (ASEAN, sigla inglés) no Organizasaun Mundiál Komérsiu (OMK) presiza no ema iha abilidade hodi kompete iha merkadu.
“Prezidente kontente ho asuntu ne’ebé hato’o no bainhira hasoru Primeiru-Ministru sempre levanta ida-ne’e”, katak.
Nia afirma katak sosiedade sivíl tenke kontinua nia papél halo kontrolu sosiál no ajuda Governu atu foti desizaun polítika ne’ebé di’ak no sustentavel liu.
Jornalista: Nelson de Sousa
Editora: Maria Auxiliadora
