Manorin Eskola Téknika Agríkola Natarbora aprezenta preokupasaun ba Xefe Estadu
DILI, 07 Agostu 2026 (TATOLI)-Reprezentante manorin husi Eskola Sekundária Téknika Agríkola Natarbora, Florindo da Costa Magalhães, aprezenta preokupasaun kona-ba falta ekipamentu ba ensinu-aprendijzajen iha eskola ne’e, liuliu dormitóriu no biblioteka ba Prezidente Repúblika, José Ramos-Horta, iha Palásiu Prezidensiál, Bairru Pité, ohin.
“Liuhusi La’o Hamutuk, ami bele mai hasoru Prezidente hodi hato’o ami-nia situasaun reál Eskola Téknika Agríkola Natarbora nian, kona-ba fasilidade aprendizajen grave tebes, liuliu dormitóriu, biblioteka”, Florindo hatete hafoin sorumutu ohin.
Nia dehan eskola ne’e durante tinan barak hato’o preokupasaun ba Ministériu Edukasaun, maibé laiha resposta. Iha 2025, Governu halo ona planu ba estudu viabilidade no levantamentu dadus iha terrenu, maibé to’o agora laiha implementasaun.
Tuir nia, atualmente eskola ne’e iha estudante na’in 147 no manorin na’in 30-resin, ne’ebé presiza apoiu atu garante prosesu ensinu no aprendizajen la’o di’ak.
Florindo mós konvida Xefe Estadu atu halo vizita bá eskola ne’e hodi haree kondisaun reál no sai mós mensajen nasionál ida katak Eskola Téknika Agríkola ne’e iha papél importante atu prepara rekursu umanu.
Durante enkontru, Ramos-Horta promete katak iha enkontru semanál ho Primeiru-Ministru sei hato’o asuntu ne’e.
Jornalista: Nelson de Sousa
Editora: Maria Auxiliadora
