OJE 2026: APORTIL ezekuta ona 35,23%
DILI, 07 Agostu 2026 (TATOLI)—Administrasaun Portu Timor-Leste, Institutu Públiku (APORTIL, I.P) ezekuta ona Orsamentu Jerál Estadu (OJE) 2026 hamutuk 35,23% iha trimestre daruak, hahú husi Janeiru to’o Juñu 2026.
Diretora Administrasaun no Finansa, Francisca Sousa Brites, hateten ezekusaun 35,23% ne’e balansu ho orsamentu karik hamutuk $1.574,800.78, ne’ebé kompostu husi kategória rua hanesan saláriu vensimentu no beins servisu korrente.
“Ami-nia ezekusaun ne’e kiik tanba iha difikuldade ba parte aprovizionamentu, komparasaun tinan kotuk bainhira ita atu trata PO nia durasaun lalais de’it kuazé loron rua, maibé sistema ida agora ne’e bele demora to’o fulan ida liu,” Diretora Administrasaun no Finansa, Francisca Brites, informa ba Agência Tatoli iha nia kna’ar fatin Kuarantena Tasi-Tolu, ohin.
Nia hateten, bainhira sira atu halo pagamentu hotu-hotu ne’e APORTIL tenke hein PO aprova lai mak foin bele halo pagamentu, entaun ida-ne’e mak afeta ba ezekusaun Orsamentu Jerál Estadu 2026.
Aleinde ne’e, nia hatutan, uluk espasu Portu sei funsiona ne’e ró seluk ne’ebé halo movimentu liuhusi tasi Timor no sira atraka hodi sosa bee, maibé agora sira halo espanda operasaun ró ba Oekusi no Ataúru (aumenta oráriu viajen) tanba presu billete ne’ebé baratu la balansu ho despeza ba ró nian.
“Ami mós agora muda fali mai iha Kuarentena Tasi-Tolu mak, ami halo fali manutensaun kuaze 80% tanba bee-moos mós laiha. Entaun, ami tenke sosa fali bee-moos hodi ense ba haris fatin sira, nune’e kondisaun servisu la hanesan ona iha Portu Dili,” nia dehan.
Jornalista : Alexandra da Costa
Editór : Cancio Ximenes
