SEFOPE realiza feira edukasaun iha Baukau
BAUKAU, 07 Agostu 2026 (TATOLI)—Governu liuhusi Sekretaria Estadu Formasaun Profisionál no Empregu (SEFOPE) realiza feira ho tema “Karreira no Edukasaun iha Baukau”.
Diretór Serbisu Munisipál SEFOPE Baukau, Roumaldo António de Sousa, esplika prosesu realizasaun feira referida nu’udár atividade programa anuál liuliu ba estudante ho objetivu divulga informasaun kona-ba oportunidade empregu produtivu no dezenvolvimentu karreira ba joven sira.
“Feira ne’e nu’udár oportunidade di’ak ba estudante sira atu aproveita rona informasaun kona-ba polítika SEFOPE nian nune’e futuru sira bele prepara di’ak liután liuliu iha kampu traballu,” Roumaldo Sousa informa ba TATOLI bainhira enserra feira iha Sentru Konvensaun Baukau (CCB-sigla portugeza) Vila Antiga, Baukau, Sesta ne’e.
Roumaldo Sousa relata atividade ne’e realiza tanba SEFOPE koopera ho diretór eskola, edukasaun, sentru formasaun, universitáriu no grupu auto empregu ne’ebé eziste iha Baukau.
Feira ne’e hetan apoiu orsamentu husi nasionál ho valór hamutuk rihun $6 iha-ne’ebé hala’o durante loron-rua (06-07/08/2026) ho ezebitór hamutuk 34 no alvu estudante hamutuk 843 ne’ebé maihusi eskola 20 kompostu husi Baukau Vila 12 no postu administrativu seluk hamutuk ualu (8).
“SEFOPE kontinua nakloke odamatan no prontu apoia ba joven sira-ne’ebé hakarak tuir formasaun kona-ba empregu no kandidatu traballadór iha rai-laran no li’ur,” Roumaldo Sousa informa.
Partisipa iha feira ne’e kompostu husi ICFP, FALINTIL-FDTL, PNTL, kompañia, ESTV Fatumaka, FILTEDA, CNJB, parseiru dezenvolvementu, sentru formasaun, IADE no APC no seluk tan.
Jornalista: Natalino Belo
Editór: Xisto Freitas da Piedade
