St. Cecilia no Parókia Lacluta reprezenta TL iha Cross Border Fest 2026 Atambua

ATAMBUA,  07 Agostu 2026 (TATOLI) – Grupu Koru Santa Cecilia husi Arkidioseze Dili no Grupu Koru Parókia Santo António Lacluta husi Dioseze Baucau reprezenta Timor-Leste hodi partisipa iha kompetisaun korál Garuda Sakti Cross Border Fest 2026, ne’ebé hala’o iha Atambua, Kabupaten Belu, Nusa Tenggara Timur (NTT), Indonézia.

Partisipasaun grupu koru Timor-Leste iha kompetisaun ne’e hetan fasilitasaun no apoiu husi Embaixada Repúblika Indonézia (KBRI) iha Dili, hafoin Ministériu Turizmu Repúblika Indonézia (Kemenpar RI) konvida KBRI atu prepara no fasilita reprezentante Timor-Leste ba kompetisaun korál ne’e.

Hodi responde ba konvite refere, KBRI Dili halo koordenasaun ho Sekretaria Estadu Arte no Kultura (SEAK) Timor-Leste no dioseze tolu, mak Arkidioseze Dili, Dioseze Baucau no Dioseze Bobonaro, atu hili grupu koru ne’ebé sei reprezenta Timor-Leste.

Inisiálmente, planeia katak reprezentante husi dioseze tolu sei partisipa iha kompetisaun. Maibé, reprezentante husi Bobonaro ikusmai la konsege marka prezensa, nune’e Timor-Leste reprezenta de’it husi grupu rua, mak Santa Cecilia husi Arkidioseze Dili no Parókia Santo António Lacluta husi Dioseze Baucau.

Aleinde grupu rua ne’ebé partisipa iha kompetisaun, Grupu Koru Universidade Católica Timorense (UCT) Dili mós marka prezensa iha Garuda Sakti Cross Border Fest 2026 nu’udar grupu konvidadu atu anima no prenxe programa iha eventu refere.

Ajente Konsul Timor-Leste iha Atambua, Indonézia, Bonifâcio Fátima Martins Belo, hateten nia sente kontente tanba Timor-Leste bele partisipa iha festivál ne’ebé envolve nasaun rua no espera reprezentante Timor-Leste bele hatudu sira-nia kapasidade di’ak.

“Ha’u sente, hanesan nasaun nia reprezentante iha ne’e, kontente tebes tanba ita bele partisipa iha festivál ida-ne’e. Husu ba ita-nia simpatizante sira no ita-nia partisipante sira atu bele kanta ho di’ak hodi reprezenta Timor-Leste iha eventu importante ida-ne’e,” Bonifâcio hateten ba TATOLI.

Nia konsidera partisipasaun Timor-Leste iha festivál ne’e importante, la’ós de’it husi aspetu arte no kultura, maibé mós nu’udar oportunidade atu hametin relasaun entre Timor-Leste no Indonézia, liuliu entre komunidade sira ne’ebé hela iha área fronteira.

Pároku Parókia Santo António Lacluta, Padre Salvador Gaspar Florindo, hateten Dioseze Baucau fó konfiansa ba Parókia Lacluta atu reprezenta dioseze refere iha kompetisaun korál iha Atambua.

“Ami mai iha ne’e lori parokianu sira husi Parókia Santo António Lacluta, no espesiálmente membru koru hamutuk nain 32, ne’ebé mai husi Santo António Lacluta hodi reprezenta sarani sira no Dioseze Baucau atu partisipa iha eventu kompetisaun vokál grupu iha Atambua,” Padre Salvador hateten.

Nia agradese ba Bispu Dioseze Baucau ne’ebé fó konfiansa ba Parókia Lacluta, no mós ba Vigáriu Jerál, Cúria no padre sira iha dioseze refere ne’ebé apoiu sira-nia partisipasaun.

“Agradese tebes ba Amo Bispu hodi fó konfiansa ida-ne’e ba Parókia Lacluta atu reprezenta Dioseze Baucau hodi partisipa iha kompetisaun vokál grupu iha Atambua,” nia dehan.

Padre Salvador mós agradese ba responsavel Notariadu iha Viqueque, Dili no Aileu ne’ebé ajuda delegasaun durante prosesu preparasaun dokumentu, liuliu prosesu atu hetan pasaporte ba membru sira.

Nia esplika katak grupu koru husi Lacluta lori membru nain 32 ba kompetisaun. Aleinde ne’e, membru Konsellu Pastorál Parókia (KPP) Lacluta nain neen mós integra delegasaun, nune’e total delegasaun hamutuk ema nain 38.

Tuir Padre Salvador, konfiansa atu lori naran Dioseze Baucau sai responsabilidade boot ba sira, nune’e grupu uza fulan ida nia laran atu prepara an antes mai Atambua.

Santa Cecilia lori membru nain 30

Iha parte seluk, Koordenadór no Maestro Koru Santa Cecilia , Fidelis Xavier Pereira, hateten sira simu konfiansa husi Arkidioseze Dili no Sekretaria Estadu Arte no Kultura atu reprezenta Timor-Leste iha kompetisaun korál Garuda Sakti Cross Border Fest 2026.

Nia esplika katak ekipa ne’ebé lori naran Arkidioseze Dili la kompostu de’it husi membru Santa Cecilia, tanba kompetisaun determina kritériu katak partisipante tenke ho idade tinan 31 ba leten.

Tanba membru Santa Cecilia balun seidauk kumpre kritériu idade refere, sira konvida mós membru koru husi Motael, Comoro no Tasi Tolu atu integra ekipa ne’e.

“Ami bolu kolega sira husi koru Motael, Comoro no Tasi Tolu, no ami hamutuk integra iha ekipa ida-ne’e ho maioria membru Koru Santa Cecilia. Ami ensaia hamutuk no prepara ho di’ak hodi hatán ba konvite husi Estadu Indonézia ba ita,” nia dehan.

Ekipa Santa Cecilia ne’ebé reprezenta Arkidioseze Dili kompostu husi membru hamutuk nain 30 ho idade tinan 31 ba leten.

Fidelis hateten konfiansa ne’ebé sira simu lori sentimentu orgullu, maibé iha tempu hanesan sai responsabilidade boot atu lori naran Timor-Leste iha eventu ne’ebé hala’o iha nasaun viziñu.

“Sentimentu orgullu tanba ida-ne’e konfiansa no responsabilidade. Hanesan Timoroan no joven, ami prontu no ami kaer ba lema ne’ebé dehan katak ‘hananu ba Maromak dala ida hanesan reza dala rua’. Nune’e ami prontu lori Arkidioseze Dili no Estadu RDTL liuhusi konkursu korál atu bele hamorin ita-nia naran iha nasaun viziñu,” Fidelis hateten.

Kompetisaun korál ne’e mós envolve grupu husi Indonézia, inklui reprezentante husi Belu, Malaka no Timor Tengah Utara (TTU), ne’ebé kompete hamutuk ho reprezentante Timor-Leste.

Rezultadu finál husi kompetisaun korál sei anunsia iha sexta kalan, 07 Agostu 2026, nu’udar parte husi série programa Garuda Sakti Cross Border Fest 2026.

Jornalista: Cidalia Fátima

Editora  : Armandina Moniz