TL no Malázia diskute hemetin kooperasaun iha área turizmu no edukasaun
DILI,07 Agostu 2026 (TATOLI)–Vise-Primeiru-Ministru no Ministru Koordenadór ba Asuntu Ekonómiku no Ministru Turizmu, Francisco Kalbuadi Lay, sesta ne’e, simu no hala’o enkontru ho Embaixadór Malázia ba Timor-Leste, Fairuz Rozali, hodi diskute kona-ba hametin kooperasaun bilateral entre nasaun rua.
Iha enkontru ne’e, reafirma kompromisu atu hametin kooperasaun iha área estratéjika oioin inklui komérsiu, investimentu, turizmu, edukasaun, dezenvolvimentu rekursu umanu no kapasitasaun institusionál.
”Ha’u agradese ba apoiu no amizade ne’ebé Governu Malázia fó durante ne’e ba Timor-Leste,” Vise-Primeiru-Ministru, Francisco Kalbuady Lay, hateten ba jornalista sira iha nia kna’ar fatin, Faról.
Nia reafirma katak Governu Timor-Leste prontu atu kontinua servisu hamutuk ho Malázia hodi promove dezenvolvimentu ekonómiku, turizmu, no setor sira seluk ne’ebé bele fó benefísiu ba povu nasaun rua.
”Enkontru ne’e reflete relasaun diplomátika ne’ebé metin entre Timor-Leste no Malázia no loke oportunidade foun ba kooperasaun iha área oioin iha futuru,” nia esplika.
Iha fatin hanesan, Embaixador Malázia ba Timor Leste, Fairuz Rozali, hateten Malázia sei kontinua apoiu Timor-Leste liuliu iha preparasaun atu sai prezidénsia ba ASEAN.
Nia mós hateten, Embaixada Malázia hein atu kontinua hametin kooperasaun no kolaborasaun ho Gabinete Primeiru-Ministru, Vise-Primeiru-Ministru no ministériu sira iha Timor-Leste.
“Ami hein katak kooperasaun no kolaborasaun entre Embaixada Malázia, Gabinete Primeiru-Ministru no ministériu sira iha Timor-Leste sei kontinua forte. Relasaun bilateral entre Malázia no Timor-Leste mak baze ida atu dezenvolve kooperasaun di’ak liután iha futuru,” nia dehan.
Jornalista : Felicidade Ximenes
Editór : Cancio Ximenes
