Atleta Xinés Bangliuzhang-Jiali Wang sai primeiru lugar iha Full Maratona 42Km
DILI, 08 Agostu 2026 (TATOLI)—Atleta Internasionál Xinés, Bangliu Zhang no Jiali Wang, okupa primeiru lugar iha kategoria Full Maratona ba mane no feto ho distánsia 42.195Km iha Dili International Maratona 2026 ne’ebé hala’o iha Dili.
Bangliu Zhang no Jiali Wang mak membru husi ekipa atleta Xina nian ba korrida distánsia naruk, no sira to’o iha Díli iha 05 Agostu 2026 hodi partisipa iha eventu desportivu internasionál ne’e.
“Ha’u agradese ba ha’u-nia nasaun tanba fó oportunidade ida-ne’e mai ha’u atu kompete iha rai-li’ur. Depois, ha’u kontente tebes tanba manán ona,” Bangliu Zhang dehan ba jornalista sira iha Palasiu Prezidensial Nicolau Lobato, Bairru Pite, ohin.
Antes ne’e, nia partisipa ona iha kompetisaun maratona iha nasaun barak maibé ida-ne’e mak dala uluk hetan oportunidade atu kompete iha eventu hanesan ne’e.
”Ida-ne’e mak dala uluk partisipa iha maratona ida-ne’e. Nia objetivu prinsipál mak atu hetan pozisaun ida-ne’ebé di’ak-liu no klasifikasaun ida-ne’ebé di’ak-liu,” nia esplika.
Aleinde ne’e, Jiali Wang ne’ebé manán iha kategoria feto kontente ho paizajen sira iha dalan ninin furak tebes, nune’e divertidu tebes atu mai iha ne’e no haree paizajen oioin iha TL.
”Ha’u halai ho sira ba tempu balun iha inísiu no sira impresionante tebes. Tanba ha’u hanoin atleta sira husi Timor forte, maibe ba tempu balun hahu halai sira halai la dun toman ha’u,” nia esplika.
Dili Internationál Maratona 2026 hala’o iha loron 08 Agostu 2026 ne’e ho kategoria Full Maratona 42.195Km, Half Maratona 21.1Km 10LKm Para-Athletes no lima (5Km) Fun Run. Korrida Full Maratona hahú iha tuku 5h30 dadeersan.
Partisipante atleta Xina na’in-rua ne’e aumenta dimensaun internasionál ba eventu ne’e, tanba sira kompete hamutuk ho atleta élite husi Timor-Leste no nasaun sira seluk iha rejiaun ASEAN no parseiru sira.
Dili International Maratona 2026 mós sai oportunidade ida atu promove relasaun entre povu Timor-Leste ho Xina liuhusi desportu no hametin amizade no interkambiu entre atleta husi nasaun rua.
Eventu tinan ida-ne’e realiza ho tema “Hadomi Ita Nia Ai-Laran no Balada Fuik Sira”, ne’ebé promove mensajen kona-ba preservasaun ambiente no natureza Timor-Leste.
Partisipasaun Bangliu Zhang no Jiali Wang iha Full Maratona 42.195Km hatudu katak Dili Internationál Maratona kontinua sai plataforma importante ba atleta internasionál atu mai Timor-Leste hodi kompete, fahe esperiénsia no hametin amizade liuhusi desportu.
Jornalista : Felicidade Ximenes
Editór : Cancio Ximenes
