DIM 2026: Felizberto de Deus sai primeiru lugar iha meia maratona kilómetru 21
DILI, 08 Agostu 2026 (TATOLI)—Atleta timoroan Felizberto de Deus sai manán-na’in ba kategoria meia maratona ho kilómetru 21 iha kompetisaun Internasionál Dili Internasionál Maratona 2026 ne’ebé hala’o iha Timor-Leste.
Iha edisaun ida ne’e, atleta timoroan Felizberto de Deus sei reprezenta Timor-Leste iha prova meia maratona kilómetru 21 nian ne’e hatudu espiritu forsa, dedikasaun no orgullu nasionál iha kompetisaun internasionál.
”Ha’u sente kontente tebes banhira ha’u manán primeiru lugar iha eventu Dili Internasional Maratona,” Felisberto dehan ba jornalista sira iha Palasiu Presidensial, ohin.
Antes ne’e, nia mós promove TL ba mundu liuhusi modalidade atletizmu iha nasaun estranjeiru no konsegue mós lori TL nia naran sai vensedór iha ASEAN GAMES iha 2023.
“Ha’u agradese ba Governu TL promove nafatin atleta timoroan sira ba mundu,” nia esplika.
Iha fatin hanesan, atleta husi Austrália Kieren ne’ebe hetan segundu lugar iha meia maratona ba kilómetru 21 ne’e sente kontente bainhira partisipa iha komppetisaun Dili Internasionál Maratona.
‘
‘Ha’u husi Austrália mai TL atu partisipa iha eventu Dili Maratona no ha’u konsege manán segundu lugar ba iha meia maratona ba kilómetru 21,” nia dehan.
Nia mai primeiravés iha Timor-Leste no nia dehan katak esperiénsia ne’e pozitivu tebes.
“Loron ne’e di’ak tebes no esperiénsia di’ak. Primeiravés mak hau tuir maratona iha eventu ida-ne’e,” nia dehan.
Kieran mós fahe katak nia la’o hamutuk ho runner lokál sira iha parte balun husi kurrida, antes tempu muda iha parte ikus.
“Ha’u la’o hamutuk ho winner, runner lokál, no nia sai husi ha’u iha kilómetru ualu antes to’o ramata. Nia runner forte tebes,” nia hateten.
Bainhira husu kona-ba apoiu no partisipasaun husi Governu no Timor-internasionál sira, Kieran hatudu importánsia konvite no kolaborasaun.
“Importante tebes ba ha’u no ema Forsa Defesza ne’ebé mai ne’e atu sai parte husi eventu ida-ne’e. Ami sente orgullu tanba Governu Timor-Leste konvida ami, no ami hein atu fila-fali iha tinan oin mai no tuir evenut ida-ne’e fali,” nia dehan.
Abertura eventu ne’e hala’o iha Palásiu Prezidensial Bairru Pite ho prezensa Prezidente Repúblika, José Ramos-Horta, ne’ebé hatudu apoiu ba dezenvolvimentu desportu no turizmu desportivu.
Maratona ofisiál iha distánsia kiloétru 42, liuhusi rute iha área tasi-ibun Díli inklui Tasi-Tolu no Kristu Rei–Dolok Oan, ne’ebé permite atleta sira kompete enkuantu apresia paisajen naturál no pontu turístiku sira.
Eventu ne’e espera simu liu 5.000 atleta husi nasaun 30 inklui Austrália, Portugál, Indonézia, Japaun, Korea Súl, Estadu Unidu no seluk. Kursu maratona hetan sertifikasaun World Athletics no akreditasaun AIMS.
Dili International Marathon 2026 mós promove saúde, amizade, inkluzaun no konservasaun ambientál, ho mensajen atu proteje natureza Timor-Leste. Objetivu jerál ne’e atu fortalese desportu no promove Timor-Leste hanesan destinasaun turizmu iha mundu.
Jornalista : Felicidade Ximenes
Editór : Cancio Ximenes
