DIM 2026 promove desportu no TL nia imajen iha nivel Internasionál
DILI, 08 agostu 2026 (TATOLI)—Dili Internationál Maratona 2026 ne’ebé partisipa husi atleta no koredores husi Timor-Leste no rai-li’ur ne’e, sai plataforma importante ida atu promove desportu, saúde, turizmu no Timor-Leste nia imajen iha nivel internasionál.
Objetivu husi Dili International Maratona la’ós de’it hanesan kompetisaun desportiva maibé mós hanesan plataforma atu promove identidade, natureza no turizmu Timor-Leste ba mundu.
Abertura atividade Dili International Marathon 2026 hala’o ho prezensa no abertura husi Prezidente Repúblika Timor-Leste, José Ramos-Horta, iha Palásiu Prezidensial Bairru Pite ne’e reflete apoiu institusionál ba dezenvolvimentu desportu no promosaun turizmu desportivu iha Timor-Leste.
Korida maratona ne’e liuhosi rute iha área tasi-ibun Díli, inklui Tasi-Tolu no área Kristo Rei–Dolok Oan, hodi fó oportunidade ba partisipante sira atu hala’o kompetisaun enkuantu apresia paisajen naturál no pontu turístiku importante sira iha kapitál.
Dili International Maratona 2026 mós fó énfaze ba saúde, inkluzaun, amizade no promosaun patrimóniu naturál Timor-Leste. Tuir informasaun komisaun organizadóra katak eventu tinan ida ne’e simu partisipante liu 5.000 husi nasaun 30 no kursu ne’e hetan sertifikasaun World Athletics no akreditasaun AIMS.
Eventu ne’e mós liga ho kampaña konservasaun ambientál ho mensajen atu hadomi no proteje floresta no moris-fuik Timor-Leste nian.
Dili Internasional Maratona ne’e hahu iha oras tuku 05h30 ne’ebe husi kategoria full maratona ho 42 km, meia maratona ho 21 km no para atletizmu 10km no fun run 5km neebe mai husi nasaun Austrália, Portugal, Indonézia, Japaun, Korea Súl, Estadu Unidu, Malázia, Filipina, Xina, Nova Zelândia, Tailándia no nasaun sira seluk.
Tuir observasaun husi jornalista Tatoli iha terrenu katak populasaun tantu rai-laran no rai-li’ur entuazismu tebes husi labarik kiik no ema boot, estudante, juventude ne’ebé nakonu ona iha estrada públiku Palasiu Prezidensial nian hodi akompana Dili Internasional Maratona 2026.
Husi atividade nee hetan seguransa másimu husi Polisia Nasional Timor-Leste.
Membru Governu ne’ebe partisipa husi Vise-Primeiru-Ministru no Ministru Koordenador Asuntu Ekonomiku no Ministru Turizmu no Ambiente, Ministru Juventude Desportu no Arte Kultura, Vise-Ministru Saude Fortalesumentu Instituisional, Atleta Internasional husi nasaun Austrália Rosa Mota, Sekretariu Estadu Floresta, Sekretariu Estadu Komunikasaun Sosial, Prezidente Atletismu ASEAN, Governador BCTL no diplomatiku sira seluk inklui artista Indonésia ne’ebé mak akompaña hamutuk ba eventu Dili Internasionál Maratona.
Jornalista : Felicidade Ximenes
Editór : Cancio Ximenes
