PNTL fó seguransa másima ba kompetisaun internasionál DIM 2026
DILI, 08 Agostu 2026 (TATOLI)—Polísia Nasionál Timor-Leste fó seguransa másima ba kompetisaun internasionál Dili Internasionál Maratona (DIM) 2026 hodi mantein orden públiku.
Tuir observasaun iha terenu katak, PNTL kontinua mantein tuir rute ne’ebé determina husi Komisaun organizadóra, no kontinua koordena ho ekipa saúde, Bombeiru no komisaun organizadora hodi asegura kompetisaun internasionál ne’e la’o ho susesu.
Komadante Operasional PNTL, Komisariu Asistensia Polisia Armado Monteiro, hateten hahú kedan iha tuku 04h00 madrugada, PNTL mobiliza ona membru sira hodi fó seguransa másimu ba eventu refere iha Munisípiu Dili.
“Hahú ohin dadeer ita mobiliza ona ita-nia membru seguransa iha terrenu, nune’e to’o agora situasaun la’o ho di’ak no hakmatek tanba kolaborasaun di’ak husi komunidade,” Armando Monteiro dehan ba jornalista sira iha Palasiu Prezidensiál Nicolau Lobato, Bairru Pite, ohin.
Nia afirma, hahú husi maratona kilómetru 42 to’o mai kilómetru lima (5) ne’e, membru polísia fó apoiu seguransa ho másimu ba atleta sira iha eventu ida-ne’e.
Daudaun ne’e, nia dehan, seguransa seidauk rejista asidente no insidente relata mai sentru operasaun nasionál.
“Ita seidauk iha relatóriu asidente no insidente ne’ebe relata mai ita-nia sentru operasaun nasionál no mos komandu iha palasiu Governu,” nia dehan.
Tanba ne’e, lori PNTL nia naran, nia hato’o agradesimentu profunda ba komunidade nia kolaborasaun di’ak ho entidade seguransa.
“Ita espera katak to’o finalidade iha oras hira tuir mai buat hotu la’o ho hakmatek no seguru,” nia garante.
Kona-ba PNTL koloka membru iha terrenu atu asegura seguransa ba atividade DIM, nia hatán, PNTL hatun nia másimu mai husi komandu Jerál, komandu munisípiu Dili ho unidade tolu, signifikan Ida-idak hala’o servisu tuir tarefa ne’ebe iha nune’e fo seguransa másimu ba eventu ne’e.
Jornalista : Felicidade Ximenes
Editór : Cancio Ximenes
