Prezidénsia Repúblika atribui prémiu DIM 2026 ba atleta manán-na’in sira

DILI, 08 Agostu 2026 (TATOLI)–Prezidénsia Repúblika, sábadu ne’e, atribui prémiu Dili Internasionál Maratona 2026 ho tema “Hadomi ita-nia ai-laran no balada fuik sira. Ida-ne’e hatudu mai atu oinsá kuidadu no prezerva floresta sira”, ba atleta manán-naín sira iha serimónia enseramentu ne’ebé hala’o iha Palásiu Prezidensiál Nicolau Lobato, Bairru Pite, Dili

Prémiu ne’e nu’udar forma apresiasaun ba sira-nia esforsu, dixiplina no dedikasaun iha kompetisaun. Atribuisaun prémiu la’ós de’it kona-ba osan ka troféu maibé mós sai símbolu ba rekoñesimentu ba kapasidade atleta, motivasaun atu kontinua dezenvolve prestasaun no kontribui ba dezenvolvimentu atletismu iha Timor-Leste.

Prezidente Asian Athletics, Dahlan Jaman B. Al-Mahad, konsidera eventu Dili INternasionál Maratona (DIM) 2026 ne’e enkoraja juventude sira atu dezenvolve abilidade báziku.

‘Ha’u fiar ho vizaun ida-ne’e, ne’ebé hakarak liu mak iha dalan loos ba realizasaun no dezenvolvimentu ne’ebé boot liu. Governu liuhusi Ministériu edukasaun no Desportu nian mós halo hela serbisu importante sira hodi apoia no enkoraja labarik sira Atletizmu nian. Inisiasaun ida-ne’e Labarik sira dezenvolve abilidade báziku, Konfiansa, dixiplina, no serbisu iha ekipa, ne’ebé bele hetan benefísiu, benefisia sira iha rikusoin sira, no iha desportu barak seluk tan. Importante liu, ida-ne’e iha,” nia dehan iha Palásiu Prezidensiál, Bairru Pite,Dili, Sabadu ne’e.

Tuir nia, desportu iha kbiit atu halibur ema no ohin loron Dili Internasionál Maratona mak sai  ezemplu perfeitu ida.

“Ha’u hakarak atu fó parabéns ba Governu kona-ba eventu ida-ne’ebé susesu. Ha’u mós hakarak agradese ba voluntáriu sira hotu, ofisiál sira, treinadór sira no ema hotu ne’ebé serbisu iha hamutuk. Vizaun ida-ne’e, susesu tebes iha esperiénsia,” nia dehan.

Entretantu, atleta Joanito Fernandes, nu’udar Primeiru lugar iha Full Maratona nasionál, konsidera DIM 2026 amizade iha ambiente desportivu.

“Ha’u sente orgullu no kontente sai vensedór ba Dili Internasionál Maratona ne’ebé Prezidente Repúblika, José Ramos Horta organiza no espera Prezidente Repúblika kontinua ho eventu ida-ne’e hodi bele akumula juventude nune’e hamenus konflitu iha ita-nia rain,” nia dehan.

Nia hateten, liuhusi desportu entre juventude bele koñese di’ak liután no kria amizade iha ambiente desportivu.

Atleta full Maratona ba kategoria feto iha DIM 2026 ne’ebé hetan primeiru lugar, Jiali Wang, husi Xina hetan $4.000, segunda lugar Edel Dhone husi Indonézia hetan $3.000 no terseira lugar João Pasia husi Filipina hetan $2.000.

Enkuantu, ba kategoria full Maratona ba kategoria mane ne’ebé okupa primeiru lugar, Bangliu Zhan, hetan $4.000, segunda lugar Sardianus Sanan hetan $3.000 no terseira lugar hetan $2.000.

Full Maratona nasionál ba primeira lugar mak Angela Araújo hetan $4.000, Abita de Jesus nu’udar segunda lugar ho osan $3.000, terseira lugar hetan $2.000, kuarta lugar hetan $800, kintu lugar hetan $700 no sesta lugar hetan $600.

Enkuantu kategoria mane. Primeira lugar Joanito Fernandes hetan $4.000, segunda lugar Jaqueo de Jesus hetan $3.000 no terseira lugar Francisco Bisa hosi Timor-Leste hetan $2.000.

Meia maratona iha DIM 2026 kategoria feto, ida-ne’eb’e sai primeira lugar mak Nefriana Ariance Daik hosi Indonézia hetan $4.000, segunda lugar Marilda Bere husi Indonézia hetan $3.000 no terseira lugar hetan $2.000.

Enkuantu, ba kategoria mane, primeira lugar okupa husi Kieren Perkins husi Australia hetan $4.000, segunda lugar Marcelino Fallo husi Indonézia hetan $3.000 no terseira lugar Matheus Wuli hosi Indonézia hetan $2.000.

Entretantu, ba kategoria meia maratona nasionál iha DIM 2026 ba kategoria feto ne’e, primeira lugarokupa husi Donita Xavier hetan $2.000, segunda lugar Ligia Correa hetan $1.500 no terseira lugar Celciana Martins hetan $1.000.

Enkuantu kategoria mane, ida-ne’ebé okupa primeira lugar mak Felisberto de Jesus hetan $4.000, segunda lugar Victorino da Costa hetan $3.000 no terseira lugar Pascoal de Jesus hetan $1.000.

Distánsia kilómetru 10 Para-Athletes iha DIM 2026 ba kategoria feto ne’ebé okupa primeira lugar mak Zulmira Cabecas hetan $4.000, segunda lugar Levanita da Costa hetan $3.000 no terseira lugar Dircia Xavier hetan $2.000.

Ba kategoria mane, ida-ne’ebé okupa primeira lugar Teofilo Freitas hetan $4.000, segunda lugar Miliano Carvalho hetan $3.000 no Joaozinho Araújo hetan $2.000, ne’ebé foti husi fundu ba DIM 2026 hamutuk rihun $75.

Jornalista : Osória Marques

Editór        Cancio Ximenes