St. Cecilia Balide okupa segundu lugar iha kompetisaun korál Cross Border Fest 2026 iha Atambua

ATAMBUA,  08 Agostu 2026 (TATOLI) – Grupu Koru Santa Cecilia Balide ne’ebé reprezenta Arkidioseze Dili no Timor-Leste okupa segundu lugar iha Kompetisaun Korál Garuda Sakti Cross Border Fest 2026, ne’ebé realiza iha Atambua, Kabupaten Belu, Nusa Tenggara Timur (NTT), Indonézia.

Bazeia ba rezultadu kompetisaun ne’ebé anunsia iha sexta-feira (07/08) kalan, Santa Cecilia okupa pozisaun daruak no lori fila prémio osan hamutuk Rp15 millaun, taxa no sertifikadu apresiasaun.

Pozisaun dahuluk hetan husi grupu koru Dekanat Belu Utara ho prémio Rp20 millaun, taxa no sertifikadu, enkuantu pozisaun datoluk hetan husi Dekanat Kefamenanu ho prémio Rp10 millaun, taxa no sertifikadu.

Dekanat Malaka okupa pozisaun dahaat, enkuantu Grupu Koru Parókia Santo António Lacluta ne’ebé reprezenta Dioseze Baucau, Timor-Leste, okupa pozisaun dalima. Grupu rua ne’e ida-idak simu sertifikadu apresiasaun.

Koordenadór no Maestro Koru Santa Cecilia, Fidelis Xavier Pereira, hateten sente orgullu no kontente ho rezultadu ne’ebé grupu ne’e hetan, liuliu tanba ida-ne’e sai esperiénsia dahuluk ba sira atu partisipa iha Garuda Sakti Cross Border Fest iha Atambua.

“Ami sente orgullu no kontente tanba primeira vez ita partisipa iha Cross Border Fest 2026 iha Atambua. Rezultadu ne’ebé ita hetan sai pasu importante ida atu ita bele haka’as an di’ak liután hodi hakat ba oin no fó di’ak liután liuhusi ita-nia talentu, liuliu hananu múzika sakra,” Fidelis hateten ba TATOLI.

Tuir nia, nu’udar grupu ne’ebé hetan konfiansa atu reprezenta Arkidioseze Dili, rezultadu ne’e sai motivasaun ba membru sira atu kontinua hasa’e sira-nia kapasidade.

“Ami reprezenta Arkidioseze Dili, tanba ne’e ami kontente no agradese ba konfiansa ne’ebé fó mai ami. Ami espera katak ba oin ita sei hetan rezultadu ne’ebé furak no di’ak liu ida-ne’e,” nia dehan.

Santa Cecilia partisipa iha kompetisaun ho membru hamutuk nain 30 ne’ebé ho idade tinan 31 ba leten. Aleinde maioria membru Santa Cecilia, ekipa ne’e mós hetan apoiu husi membru koru Motael, Comoro no Tasi Tolu atu kumpre kritériu partisipante ne’ebé organizadór determina.

Partisipasaun Santa Cecilia Balide hamutuk ho Parókia Santo António Lacluta husi Dioseze Baucau sai parte husi reprezentasaun Timor-Leste iha kompetisaun koru transfronteirisu ne’ebé hetan fasilitasaun husi Embaixada Repúblika Indonézia (KBRI) iha Dili.

Lacluta prioritiza esperiénsia

Maski okupa pozisaun dalima, Pároku Parókia Santo António Lacluta, Padre Salvador Gaspar Florindo, konsidera partisipasaun grupu ne’e fó esperiénsia valioza ba sira tanba bele hola parte iha atividade transfronteirisa ne’ebé halibur Timor-Leste no Indonézia.

“Ami agradese tanba bele partisipa iha eventu ida-ne’e, liuliu ami bele hola parte iha eventu internasionál entre Indonézia no Timor-Leste. Ida-ne’e esperiénsia osan-mean ba ami. La’ós atu tenke manán, maibé importante mak manán esperiénsia,” Padre Salvador hateten.

Nia agradese ba parte hotu iha Indonézia ne’ebé apoia atividade refere, no mós ba lideransa Dioseze Baucau ne’ebé fó konfiansa ba Parókia Santo António Lacluta atu partisipa iha Atambua.

“Agradese ba jajaran hotu husi Indonézia no mós parte hotu husi dioseze, liuliu Amo Bispu, Vigáriu Jerál no Cúria ne’ebé fó konfiansa mai ami. Ami bele aprende no hetan esperiénsia barak liután iha ema nia rain,” nia dehan.

Parókia Santo António Lacluta lori membru koru hamutuk nain 32 atu partisipa iha kompetisaun. Hamutuk ho membru Konsellu Pastorál Parókia (KPP) nain neen, total delegasaun husi Lacluta hamutuk ema nain 38.

Kompetisaun refere hetan avaliasaun husi júri nain tolu husi Programa Estudu Edukasaun Múzika Universidade Católica Widya Mandira (UNWIRA) Kupang, mak Paskalis Romy Langu, Stanislaus Sagai Tolan no Yohanes Don Bosco Bakok.

Atividade ne’e mós hetan partisipasaun husi Xefe Servisu Turizmu no Kultura Kabupaten Belu, Januaria Nona Alo; Ajente Konsul Timor-Leste iha Atambua, Bonifâcio Fátima Martins Belo; Responsavel ba Funsaun Informasaun, Sosiál no Kultura (PENSOSBUD) KBRI Dili, Ratu Yulya Chaerani; no Vigáriu Jerál Arkidioseze Dili, Padre Graciano Santos Barros.

Kompetisaun koru sai nu’udar parte ida husi série atividade Garuda Sakti Cross Border Fest 2026 ne’ebé halibur partisipante sira husi Timor-Leste no Indonézia liuhusi arte no múzika.

Jornalista: Cidalia Fátima

Editor  : Armandina Moniz