Izraél rejeita planu pontu 15 husi Trump ba Gaza
DILI, 09 Agostu 2026 (TATOLI) – Primeiru-Ministru Benjamin Netanyahu fó-sai katak Izraél rejeita ona Prezidente Estadus Unidu Amérika nian Donald Trump nia planu Konsellu Dame nian ba Gaza no sei la retira forsa sira to’o grupu palestinianu Hamas dezarma totál.
“Izraél rejeita dokumentu ho pontu 15,’ Netanyahu hatete iha reuniaun gabinete nian iha loron-domingu, hodi refere ba planu ne’ebé aprova iha fulan liubá hosi Hamas.
Ezérsitu Izraélita “sei la retira to’o Hamas hetan dezarmamentu loloos … no sei kontinua atu kontra ameasa sira hasoru ami-nia forsa sira no ami-nia sidadaun sira.”
Nia hatutan tan katak Izraél “ko’alia hela ho Amerikanu sira kona-ba asuntu ida-ne’e.”
“Sira iha ideia, balun ami aseitavel no balun la aseitavel ba ami, no ami hatene hamriik metin iha buat sira ne’e,” primeiru ministru hateten.
Laiha resposta imediata hosi White House ka Hamas.
Izraél kontinua atu hala’o atake mortál sira kuaze loroloron iha Faixa Gaza nian dezde konkorda ho “sesarfogu” ho Hamas iha fulan-Outubru liubá.
Trump anunsia iha loron 30 fulan-Jullu akordu “istóriku” ida ne’ebé implika “dezarmamentu kompletu hosi Hamas no grupu armadu sira seluk iha Gaza”, ne’ebé nia konsidera “pasu monumentál ida ba dame no seguransa ne’ebé dura.”
Maibé iha semana kotuk, Konsellu Dame nian ne’ebé lidera hosi EUA hatete katak retirada Izraélita ida hosi Gaza sei akontese de’it hafoin dezarmamentu Hamas nian kompletu, hafoin enkontru ida entre diretór órgaun nian, Nickolay Mladenov, no Netanyahu.
Ko’alia ba nia gabinete iha Domingu, Netanyahu promete katak “enkuantu ha’u maka primeiru-ministru, laiha Estadu Palestinianu ida maka sei mosu” no subliña katak Izraél sei la kumpri planu ne’ebé hetan apoiu hosi EUA.
Izraél nia hakarak ba “dezarmamentu loloos, la’ós dezarmamentu fiktivu” sei signifika hasai armamentu hotu-hotu, inklui arma sira ne’ebé kmaan liu, nia hatete.
Planu pontu 15 ne’e husu atu inisialmente foka ba armamentu pezadu Hamas nian, fatin produsaun militár sira, depózitu arma sira nian no rede túnel ne’ebé luan hosi grupu.
Relatóriu hosi Sidade Gaza, Hani Mahmoud hosi Al Jazeera hatete katak deklarasaun Netanyahu nian hamosu “pergunta sériu sira” ba palestinianu sira kona-ba dalan atu sai hosi ostilidade sira.
“Rejeisaun kompletu iha-ne’e tau sekuensiamentu no etapa sira iha kestaun,” Mahmoud hatete.
Relatóriu hosi Belém iha Cisjordánia okupada, Nour Odeh hosi Al Jazeera hatete katak kondisaun sira ne’ebé Netanyahu deklara bele sai “problemátiku tebes ba Konsellu Dame nian no mediadór sira ne’ebé serbisu ona durante fulan barak ona hodi tenta hala’o dezarmamentu Hamas nian.”
Roteiru ne’e ikusmai sei envolve transferénsia administrasaun loron-loron Gaza nian ba komité teknokrátiku palestinianu ida ne’ebé opera iha supervizaun hosi Konsellu Dame nian.
Maibé konsellu ne’ebé harii hosi Trump iha “poder limitadu tebes” atu avansa lahó apoiu Izraélita, Odeh hatete.
“Netanyahu hanehan ona botaun reset nian,” nia hatete.
Dezde Hamas no Izraél konkorda ho “sesarfogu” iha Outubru liubá, peritu sira espresa ona eskeptisizmu katak Izraél sei onra akordu ne’e tanba nia forsa sira kontinua baku Gaza, hodi hamate ema atus-resin.
Dezde “sesarfogu” hahú iha fulan-Outubru nia klaran tinan kotuk, pelumenus ema na’in 1,250 maka mate no na’in 4,120 hetan kanek ho mate-isin liu 800 ne’ebé maka rekupera hosi rai-rahun, tuir ministériu saúde Gaza nian.
Númeru jerál mate nian iha Gaza dezde Outubru 2023 maka pelumenus 73,300 no kanek 174,000.
Notísia relevante: Militár indonézia ida mate iha konflitu entre Hezbollah no Izraél
Fonte: Aljazeera
