AMD husu kareta-na’in prepara garajen atu evita engrafamentu iha Díli
DÍLI, 10 Agostu 2026 (TATOLI) – Prezidente Autoridade Munisípiu Díli (PAM-Díli), Francisco dos Santos, husu ba sidadaun sira atu prepara fatin garajen hodi evita kareta sira para iha estrada públika hodi hamenus engrafamentu.
Francisco hato’oi katak kareta na’in sira tenke prepara fatin parazen rasik no labele uza estrada públika no paseiu hanesan fatin atu para kareta, tanba bele hamosu engrafamentu no impede movimentasaun transporte iha kapitál.
“Husu ba komunidade ne’ebé iha kareta tenke para iha ida-idak nia fatin garajen, la’ós ba para fali iha estrada sorin-sorinhodi hamosu engrafamentu. Pior liu tan balu para fali iha paseiu hodi la fó espasu ba ema ne’ebé lao-ain,” Francisco ba TATOLI iha nia knar-fatin iha Munisípiu Díli, Segunda-feira.
Nia dehan karik komunidade kontinua para kareta iha estsrada no paseiu mak ekipa konjunta husi Diresaun Nasionál Transportes Terrestres (DNTT) hamutuk ho Diresaun Tránzitu no Seguransa Rodoviária Nasionál, AMD no Sekretaria Estadu Asuntu Toponímia no Organizasaun Urbana (SEATOU) sei halo apreensaun no aplika koima.
Francisco husu mós ba sira ne’ebé mak planeia atu sosa kareta karik tenke prepara fatin garajen.
Nia salienta katak medida ne’e foti atu organiza no halo Díli sai furak no orgabuzady iha ema hotu nia matan.
Molok ne’e, ekipa konjunta hala’o operasaun iha bairo sira iha Díli hodi sita kareta sira ne’ebé para iha estrada públika no lori ba DNTT. Ihga semana dahuluk fulan Agostu, ekipa konjunta sita kareta 40 resin.
Francisco klarifika katak medida ne’e mós nu’udar edukasaun sivika atu fó hanoin ba sidadaun hotu-hotu hodi respeitu regra no regulamentu uzu estrada públika.
Jornalista: Camilio de Sousa
Editór: Filomeno Martins
