Autoridade lokál husu BTL kanaliza bee-moos ba aldeia tolu iha Bairo-Pite
DÍLI, 10 Agostu 2026 (TATOLI) – Xefe Suku Bairo-Pite, Joaninha Alves Soares, hato’o katak aldeia tolu suku ne’e seidauk asesu ba bee-moos ne’ebé fornese husi Bee Timor-Leste (BTL, E.P.).
Aldeia tolu ne’e mak hanesan Moris ba Dame, Ribeira Malao no Avansa.
Autoridade Suku Bairo-Pite submete ona proposta ba BTL atu halo kanalizasaun ba bee-moos iha aldeia hirak-ne’e, maibé to’o agora seidauk simu resposta.
“Suku Bairo-Pite hamutuk 26 aldeia, entre 26 aldeia ne’e aldeia tolu – Moris ba Dame, Ribeira Malao no Avansa mak sei falta bee-moos. Ami ubmete ona proposta ba BTL, E.P., maibé seidauk iha resposta,” Joaninha ba TATOLI, iha Sede Suku Bairo-Pite, ohin.
Tuir Joaninha, Aldeia Moris ba Dame iha uma-kain 234, Ribeira Malao iha uma-kain 204 no Avansa iha uma-kain 151.
“Komunidade iha aldeia hirak-ne’e uza bee husi uma vizinu sira atu responde ba nesesidade loroloron,” nia dehan.
Suku Bairo-Pite iha uma-kain hamutuk 5.965, ho total populasaun ema 25.923.
Jornalista: Camilio de Sousa
Editór: Filomeno Martins
