Carmona konsidera Tribunál sei menus rekursu umanu

BAUKAU, 10 Agostu 2026 (TATOLI)—Prezidente Tribunál Rekursu, Afonso Carmona, konsidera Tribunál sei menus rekursu umanu iha área juís nune’e planeia sei kontinua halo rekrutamentu hodi dirije julgamentu iha Timor-Leste.

Nia esplika númeru juís iha Timor-Leste sei menus bainhira koloka ba kada Tribunál Judisiál Primeira Instánsia hanesan iha Dili, Ermera, Bobonaru, Vikeke no Baukau.

“Tribunál komesa luan ona entaun numéru tenke aumenta. Tan ne’e, Konsellu prepara loke kuadru tanba presiza aumenta juís,” Prezidente Tribunál Rekursu Afonso Carmona hateten iha Vila Nova, Baukau, Segunda ne’e.

Afonso Carmona relata setór justisa espesiál Tribunál sei menus rekursu hanesan juís iha-ne’ebé atuál rejista totál juís definitivu foin 32 ho estajiadu 12, enkuantu na’in-14 sei iha faze formasaun.

Aleinde ne’e, Tribunál rasik iha ona planu hodi solusiona menus rekursu umanu referidu hanesan programa kapasitasaun no rekruta iha-ne’ebé durante tinan-lima mai alvu numéru juís iha Timor-Leste hamutuk 125.

“Ha’u hanoin bainhira atinje numéru ne’e sufisiente ona tanba Timor nasaun ki’ik,” Afonso Carmona akresenta.

Eis Juís Administradór Tribunál Distritál Dili ne’e argumenta Timor-Leste nasaun ki’ik maibé inklina an iha organizasaun Komunidade Nasaun Ko’alia Portugés  (CPLP-sigla portugeza) no ASEAN iha-ne’ebé iha poténsia mosu krime organizadu nune’e vizaun iha setór justisa presiza prevensaun ba konflitu hanesan kria pás nune’e sai ezemplár ba nasaun li’ur.

Entretantu, Tribunál Judisiál Primeira Instánsia Baukau rasik rejista juís hamutuk na’in-hitu kompostu husi juís definitivu na’in-lima no estajiadu na’in-rua.

Jornalista: Natalino Belo 

Editór: Xisto Freitas da Piedade