Edifísiu TJPI Baukau hahú faze konstrusaun
BAUKAU, 10 Agostu 2026 (TATOLI)—Edifisiu Tribunál Judisiál Primeira Instánsia (TJPI) Baukau hahú iha faze konstrusaun hafoin Segunda ne’e ramata serimónia hatuur fatuk dahuluk.
Prezidente Tribunál Rekursu (PTR), Afonso Carmona, esplika dezenvolvimentu iha setór Tribunál la sees husi fasilidade no rekursu umanu nune’e lansamentu fatuk dahuluk ne’e parte husi esforsu husi tinan 2011 ho objetivu harii edifisiu foun iha-ne’ebé loke espasu ba komunidade Baukau atu asesu ba justisa.
“Prosesu ida-ne’e ha’u husu ba komunidade atu kontinua fó korajen, motivasaun nune’e Tribunál bele halo serbisu tuir regra,” Prezidente Tribunál Rekursu hateten bainhira lansa fatuk dahuluk konstrusaun edifisiu TJPI Vila Nova, Baukau.
Afonso Carmona relata mezmu durante konstrusaun Estadu setór justisa sei kontinua enfrenta menus kondisaun maibé nia kompromete durante mandatu sei solusiona fazeadamente ligadu ho infraestrutura.
Aleinde ne’e, projetu referidu finansia husi Governu kauza TR menus orsamentu, mezmu nune’e jere no responsabilidade direta husi Tribunál Rekursu.
“Espera kompañia bele aselera lalais obra ne’e, tanba programa ne’e tinan-ne’e,” Afonso Carmona akresenta.
Afonso Carmona hateten edifisiu TJPI rasik kompleta ho rezidénsia ba juís no ofisiál justisa ho objetivu atu iha kondisaun digna no antesipa mosu tentativa hanesan influénsia desizaun no prevene ameasa durante prosesu julgamentu iha Munisípiu Baukau.
Entretantu, projetu konstrusaun Tribunál Judisiál Primeira Instánsia Baukau ho valór orsamentu $4.289.405,82 ne’ebé responsabiliza husi Kompañia Internasionál Shadon Hejan Construction ho durasaun tinan-ida.
Jornalista: Natalino Belo
Editór: Xisto Freitas da Piedade
