FFTL estende kontratu José Pedro to’o jogu FIFA ASEAN Cup ramata
DILI, 10 Agostu 2026 (TATOLI) –Federasaun Futeból Timor-Leste (FFTL) deside estende kontratu Treinadór Selesaun Nasionál, José Pedro Salazar, to’o rjogu FIFA ASEAN Cup ramata iha fulan-Setembru ne’e.
Desizaun ne’e foti tanba kalan ba jogu ne’e hela de’it semana rua resin no FFTL haree la seguru atu buka treinadór foun iha tempu badak.
“Kontratu treinadór nian loron 31 agora termina ona. Ita hanoin atu hapara ona nia maibé iha fulan-Setembru jogu importante, jogu FIFA ASEAN Cup atu la’o. Ne’e jogu ida-ne’ebé importante,” Diretór Selesaun Nasionál FFTL, João Maneco, hateten ba jornalista sira iha edifísiu FFTL, ohin.
Nia esplika katak ho kondisaun tempu ne’ebé maka’as, FFTL labele foti risku troka treinadór.
“Liga ba asuntu sira-ne’e, ita haree katak jogu ne’e hela de’it semana rua resin hodi enfrenta jogu ne’e. Entaun, ita labele buka treinadór foun. FFTL deside fó tan tempu ikus ba nia husi jogu ne’e. Depois mak foti desizaun ba nia,” nia dehan.
Nune’e, FFTL ofisialmente estende mandatu José Pedro Salazar nian durante kompetisaun ASEAN Cup.
“Signifika FFTL estende tan nia mandatu husi jogu FIFA ASEAN Cup. Alvu ita-nian ba jogu ne’e mak Timor-Leste labele derrota,” nia dehan.
João Maneco haktuir tan katak Timor-Leste sei tama iha grupu ida ho Kamboja no Laos.
“Jogu ne’e ita grupu ida ho Kambodja no Laos. Ita tenke sai kampiaun grupu. Nune’e ita pasa iha divizaun segundu. Ita bele ba kompete fali iha divizaun primeiru,” nia hateten.
Jornalista : Hortêncio Sanchez
Editór : Cancio Ximenes
