FRETILIN konsidera Lei Siberseguransa pertinente ba kombate scame online
DILI, 10 Agostu 2026 (TATOLI) –Vise Bankada Frente Revolusionária Timor-Leste Independente (FRETILIN), David Dias Ximenes, konsidera proposta Lei Siberseguransa importante tebes ba prosesu transformasaun dijitál no seguransa iha setór dijitál nian, liuliu atu kontrola di’ak liután jogu scame online ne’ebé daudaun buras iha rai-laran.
Bankada apoia inisiativa Governu ne’ebé submete ona proposta lei ne’e ba órgaun lejizlativa ne’ebé husu autorizasaun lejizlativa hodi aprova pakote lejizlativu integradu ida kona-ba siberseguransa, ne’ebé kobre krime no prosesu kriminál sira iha ámbitu dijitál no definisaun rejime jurídiku siberespasu nasionál.
Nia hatete katak kestaun ne’e seguransa soberania nian ne’ebé sai asuntu Estadu nian no hothotu presiza hamutuk atu kombate. Tanba ne’e, dezde inísiu bankada sempre alerta atu fó atensaun séria no relatóriu Nasaun Unida rasik fó sai. “[Proposta lei ne’e] pertinente tebes, para ema labele halo arbiru de’it. Ida agora Starlink ne’e pozitivu tau tiha ne’e, pois ema aproveita halo fali online, ida ne’e mak loloos labele”, nia realsa.
Deputadu lamenta katak iha argidu balun ne’ebé autoridade seguransa detein tanba envolve iha kazu scame online, maibé tribunál aplika de’it medida termu identidade rezidénsia, no husu atu kontinua halo investigasaun kle’an hodi prosesa tuir dalan legál ne’ebé iha.
Prezidente Parlamentu Nasionál, Maria Fernanda Lay, hateten meza simu ona pakote lejizlativu siberseguransa husi Governu, maibé sei halo ajenda diskusaun depoizde resesuiha 15 Setembru ne’e.
Notísia relevante: https://tatoli.tl/2026/07/13/cnrt-elojia-pntl-ba-dezmantela-rede-scam-online-fretilin-alerta-medida-seria/
Komisaun A ne’ebé Trata Asuntu Konstitusionál no Justisa, iha loron 01 fulan-Agostu ne’e hala’o viajen bá Filipina no Tailándia hodi halo estudu komparativu hodi haree referénsia ba implementasaun Lei Sibernétika, Siberseguransa no Protesaun Dadus.
Estudu ne’e ho obnetivu atu buka esperiénsia, koñesimentu no abilidade relasiona ho hamosu lei hirak ne’e hodi sai referénsia ba deputadu sira bainhira halo diskusaun no aprovasaun.
Notísia relevante: Governu submete ba Parlamentu proposta pakote lejizlativu siberseguransa
Jornalista: Nelson de Sousa
Editora: Maria Auxiliadora
