Janeiru-Juñu: IGEADI kontribui reseita rihun $314 ba kofre Estadu

DILI, 10 Agostu 2026 (TATOLI)-Institutu Jestaun Ekipamentu Apoiu Dezenvolvimentu Infraestrutura (IGEADI), husi Janeiru to’o Juñu 2026 ne’e, IGEADI konsege rekolla reseita ba kofre Estadu hamutuk rihun $314.

Prezidente Institutu Jestaun Ekipamentu Apoiu Dezenvolvimentu Infraestrutura (IGEADI), Ana Paula da Cruz, hateten IGEADI aleinde halo servisu apoiu komunidade maibé mós rekolla reseitas ba Estadu, entaun alvu projesaun ne’ebé Ministériu Finansa fó ba sira tinan ida tenke rekolla hamutuk rihun $240.

Iha trimestre dahuluk, IGEADI konsege rekolla reseita rihun $314, ne’e signifika katak sira ultrapasa ona projesaun ne’ebé iha.

“Tanba ne’e ha’u fiar katak iha tinan ne’e ramata ami bele rekolla to’o rihun $500,” Prezidente IGEADI hateten ba Agência Tatoli liuhusi telefónika, ohin.

Dirijente ne’e hatutan katak reseita ne’ebé sira rekolla kompostu husi atividade rua mak fó aluga ekipamentu pezadu no faan fatuk britas ne’ebé lokaliza iha Natarbora, entaun projetu sira-ne’ebé implementa iha parte kosta súl barak liu mak sosa fatuk britas iha ne’ebá.

“Liga fali ba servisu apoiu komunidade nian husi fulan-Janeiru to’o Agostu ne’e IGEADI simu pedidu hamutuk 60 husi territóriu nasionál. Kuaze iha pedidu 40 mak ami rezolve ona, enkuantu 20 pedidu ne’e rezolve husi kompañia no balun tama iha programa tendernizasaun husi MOP nian,” nia informa.

Nia hatutan, pedidu sira-ne’e barak liuhusi tipu emerjénsia hanesan dalan monu, bee tama komunidade nia uma no sedimentasaun. Maske agora la’ós ona tempu udan maibe parte kosta súl sira sei nafatin udan, nune’e sira nafatin destaka mákina pezadu sira atu bele halo atendimentu emerjénsia ruma.

“Hanesan agora daudaun, ami apoiu normaliza dalan ba preparasaun loron FALINTIL nian iha foho Matebian nia hun ne’eba ne’e, tamba ita presiza loke espasu dalan atu ema bele halo movimentu ho di’ak,” nia dehan.

Jornalista : Alexandra da Costa

Editór        : Cancio Ximenes