KAK atualiza progresu servisu kona-ba kombate korrupsaun ba Xefe Estadu
DILI, 11 Agostu 2026 (TATOLI)–Prezidente Repúblika, José Ramos-Horta, segunda ne’e, simu Komisáriu Komisaun Anti-Korrupsaun (KAK), Rui Pereira, ho delegasaun iha Palásiu Prezidensiál Nicolau Lobato, Bairru Pite, hodi atualiza progresu servisu durante ne’e liuliu kona-ba kombate korrupsaun.
Komisáriu Komisaun Anti-Korrupsaun (KAK), Rui Pereira, hateten iha enkontru ne’e fó oportunidade ba Xefe Estadu atu haree fila-fali inisiativa kombate korrupsaun ne’ebé la’o hela iha nasaun laran no destaka destaka avansu foun iha kooperasaun institusionál no prevensaun ba korrupsaun.
“Ita mós fahe informasaun di’ak kona-ba dezenvolvimentu infraestrutura KAK nian, liuliu konstrusaun ne’ebé la’o hela ba sede foun Komisaun nian iha Faról, ho apoiu husi Ministériu Planeamentu no Investimentu,” Komisáriu ne’e hateten.
Nia mós hato’o dezafiu atuál sira-ne’ebé KAK hasoru iha Divizaun Investigasaun Kriminál, liuliu kona-ba koordenasaun kazu sira ho Prokuradoria-Jerál Repúblika.
Nia dehan, Ramos-Horta reafirma nia kompromisu atu akompaña besik liután dezenvolvimentu sira-ne’e.
“Ita-nia Prezidente komprometidu atu garante prestasaun justisa ne’ebé efikáz no transparente iha Timor-Leste. KAK iha papel fundamentál atu proteje fundu públiku no fó konfiansa ba povu,” nia dehan.
Jornalista : Hortêncio Sanchez
Editór : Cancio Ximenes
