TL-Malázia hametin kooperasaun iha kapasitasaun rekursu umanu
DILI, 10 Agostu 2026 (TATOLI)—Governu Malázia liuhusi Embaixadór foun Malázia ba Timor-Leste (TL), Fairuz Adli Bin Mohd Rozali, Segunda ne’e, hasoru-malu ho Vise Primeiru-Ministru II no Ministru Koordenadór Asuntu Sosiál, Mariano Assanami Sabino, hodi diskute kona-ba oportunidade no dezenvolvimentu kooperasaun bilaterál iha área oioin.
Embaixadór Malázia hateten enkontru ne’e nu’udár oportunidade ba nia atu aprezenta-an ofisialmente nu’udár embaixadór foun. Nune’e, ohin ne’e mai hamutuk ho Governu Timor-Leste hodi diskute kona-ba oportunidade sira atu dezenvolve no hametin liután kooperasaun inklui iha área kapasitasaun rekursu umanu.
“Iha enkontru ne’e, Malázia ho Timor-Leste hametin tan kooperasaun iha área oioin, liuliu edukasaun, saúde, agrikultura, infrastrutura no kapasitasaun rekursu umanu. Buat sira-ne’e hotu mak parte rua diskute,” Embaixadór Malázia dehan ba jornalista sira hafoin hala’o enkontru ho Vise Primeiru-Ministru iha Palásiu Governu.
Nia dehan enkontru ne’e mós sai nu’udár oportunidade atu troka hanoin kona-ba relasaun bilaterál entre Malázia no Timor-Leste liliu iha área dezenvolvimentu rekursu umanu no kooperasaun iha konteksu ASEAN.
Nia mós hato’o nia prontidaun atu servisu hamutuk ho Governu Timor-Leste, instituisaun públika no ajénsia sira hotu, hodi hametin liután kooperasaun no relasaun bilaterál entre nasaun rua.
“Nu’udár Embaixadór Malázia, ha’u prontu atu servisu hamutuk ho Timor-Leste, ho instituisaun sira no ajénsia hotu-hotu iha Timor-Leste, atu hametin liután kooperasaun no hasa’e liután relasaun bilaterál entre nasaun rua ne’e,” nia dehan.
Aleinde ne’e mós Vise Primeiru-Ministru II no Ministru Koordenadór Asuntu Sosiál, Mariano Assanami Sabino, hato’o apresiasaun ba prezensa Embaixadór Malázia ne’ebé mai hasoru-malu hodi diskute hamutuk kona-ba oinsá atu hadi’a liután kooperasaun entre Timor-Leste no Malázia.
Vise Assanami agradese ba Governu Malázia tanba apoiu ne’ebé fó ba Timor-Leste iha prosesu atu sai membru ASEAN, no ba atividade no inisiativa oioin ne’ebé Malázia ajuda ona iha Timor-Leste.
Embaixadór Malázia dehan depoiz Timor-Leste tama nu’udár membru ba da-11 ASEAN iha 26 Outubru 2025, relasaun entre nasaun rua ne’e kontinua dezenvolve di’ak.
Nia hatutan dezde Timor-Leste tama ASEAN, timoroan barak kontinua bá Malázia atu tuir estudu, no turista timoroan mós aumenta nia interese atu vizita Malázia. Iha parte seluk, sidadaun Malázia mós mai vizita Timor-Leste.
Tuir embaixadór, movimentu entre povu rua no kooperasaun iha área oioin ne’e hatudu katak relasaun entre Timor-Leste no Malázia la’o di’ak no kontinua hametin.
Jornalista: Osória Marques
Editór: Xisto Freitas da Piedade
