Assanami husu joven sira estuda-labele utiliza mídia sosiál insulta líder nasionál
DILI, 11 Agostu 2026 (TATOLI)—Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun, Mariano Assanami Sabino, husu joven sira estuda no labele utiliza mídia sosiál hodi insulta malu no tarata aat lider nasionál sira.
“Alerta ba joven sira, imi mak futuru nasaun ida-ne’e, ho era modernu teknolojia ida ohin loron atu aproveita estuda, labele utiliza mídia sosiál hodi insulta malu, trata aat ita-nia lider sira. Nasaun ne’e ema barak mak mate hodi sosa independensia. Ohin loron, ita konkista ona mehi eroi sira-nian, imi joven mak sei kontinua lori nasaun ne’e ba oin. Nune’e, para ona utiliza mídia sosiál hodi insulta malu,” Assanami hateten iha Otel Timor hafoin halo lansamentu ba Konferénsia Direitu no Protesaun Labarik no Foinsa’e iha Timor-Leste, ohin.
Nia dehan, joven sira atu sai lider ne’ebé di’ak labele kopia tuir polítiku ne’ebé halo husi líder sira balun ne’ebé gosta trata malu.
“Joven sira atu sai líder ne’ebé di’ak iha futuru aprende ona no rai imi nia aan. Labele fotokopia karáter husi líder sira-ne’ebé halo insulta tun sa’e, ne’e la di’ak,” Assanami dehan.
Nia hatutan, ema rihun barak mate ba nasaun ida-ne’e liuliu ki’ikoan sira, maibé líder sira naran iha mak sai eroi, kiik sira naran latama hanesan eroi.
“Para ona odiu malu no vinga malu husi 1975 mai kotu iha 1999. Agora ba oin ita tenke hamutuk, labele sente katak ita de’it mak hadomi rai ne’e no ema seluk la hadomi rai ne’e. Mentalidade ne’e tenke hakotu ona, nasaun ne’e ema hotu nia kontribuisaun mak hetan independensia,” nia hateten.
Tuir Assanami, maske ema hotu difirensa partidu maibé hanoin ida de’it mak oinsá lori nasaun ne’e ba oin.
“Ita bele iha partidu keta-ketak maibé ita-nia objetuvu ida de’it mak atu lori nasaun ne’e ba oin. Ita labele tau iha ita-nia hanoin katak ema seluk diferensa ho ita no iha polítika sira laiha hanoin di’ak ba nasaun ne’e. Ema hotu iha hanoin di’ak ba rai ne’e, mai ita hamutuk hodi drzenvolve nasaun ne’e,” nia dehan.
Jornalista : Hortêncio Sanchez
Editór : Cancio Ximenes
