DIM 2026: Ekipa saúde fó tratametu ba atleta hamutuk 60
DILI, 11 Agostu 2026 (TATOLI)—Diretór Servisu Nasionál Ambulánsia Emerjénsia Medikamentu (SNAEM), Simplicio Amaral, informa durante realiza atividade Dili Internasional Maratona 2026 iha sábadu (08 Agostu 2026) ne’e ekipa saúde fó tratametu ba atleta hamutuk na’in-60.
“Totál atleta sira-ne’ebé mak atende iha oras tuku lima dadeer to’o meudia ne’e ekipa atende pasiente hamutuk ema na’in-60 ne’ebé kompostu husi feto na’in-sia (9) no mane na’in-51,” Simplicio Amaral informa ba jornalista sira iha nia knaar fatin, Kaikoli, ohin.
Nia esplika, atleta balun kalan la deskansa entaun dadeersan nia halai ne’e monu sedu, entaun ekipa saúde fó diagnosa hafoin nia rekupera fila-fali.
“Pasiente sira na’in-60 ne’e laiha ida mak ita halo transferénsia ba HNGV, maibé ita halo tratamentu iha postu médiku ne’ebé mak ita harii tanba sira-nia kondisaun mai ho kmaan de’it,” nia hateten.
Nia relata, pasiente sira-ne’e maioria timoroan maibé iha atleta ida mak pasiente estranjeiru husi nasaun Japaun.
“Iha eventu Dili Internasionál Maratona ne’e, SNAEM destaka ambulánsia neen ho tan karreta box boot ida, ne’e uza ba mobile klinika emerjénsia médika. Maibé, karreta ne’e koloka ba iha Dolokoan iha Cristo Rei nian ne’e,” nia dehan.
Nia esplika, iha eventu Dili Intrnasionál Maratona ne’e, SNAEM destaka ekipa saúde iha atividade ne’e hamutuk 50 inklui ho parseiru sira husi CVTL hamutuk 60, ne’ebé atende atleta durante iha terrenu.
Jornalista : Felicidade Ximenes
Editór : Cancio Ximenes
