Família pasiente husu MS atu hadi’a sistema transferénsia pasiente ba rai-li’ur
DILI, 11 Agostu 2026 (TATOLI)–Família pasiente Marilio Sousa dos Santos Lay husu Governu liuhusi Ministeriu Saúde atu hadi’a sistema transferénsia pasiente ba rai-li’ur tanba sira-nia oan Marilio moras kankru ne’ebé urjentimente atu transfere ba rai-li’ur, maibé dokumentu transferénsia nian ne’e trata kedas iha fulan-Abríl maibé to’o agora seidauk hetan resposata husi ospitál rai-li’ur.
Reprezentante família, Rosa Santos Lay, hateten pasiente Marilio Sousa dos Santos Lay ne’e hetan moras ne’e dezde iha tinan kotuk no mai beibeik konsulta iha Hospital Nasionál Guido Valadares (HNGV) no ikusmai doutór husu atu halo transferénsia ba rai-li’ur tanba ekipamentu ne’ebé atu rekupera moras ne’e la sufisiente.
“Pasiente ne’e moras kuaze tinan ida resin ona, hahú iha tinan kotuk mai to’o agora. Iha Setembru tinan kotuk ne’e kedas ami komesa mai halo check up hela de’it, no tama iha Novembru ne’e nia komesa baixa ona. Ida-ne’e di’ak tiha sai fali no tama sai hospital ida-ne’e no ikus mai doutór sira dehan nia tenke ba halo tratamentu iha rai-li’ur. Nune’e, ami konfirma ho sira no ikus mai hahú trata pasiente nia dokumentu iha fulan-Abríl ne’e, maibé to’o agora ministra Saúde aprova ona maibe laiha rezultadu nafatin husi ospital rai-li’ur iha Malázia,” Rosa Santos Lay hateten ba jornalista sira iha HNGV, ohin.
Nia espika, ho atendementu sira-ne’ebé mak kle’ur nune’e família mak família ezije atu Governu hadi’a sistema saúde iha Timor-Leste tanba ida-ne’e kona-ba ema-nia vida.
“Ami pasiénsia tanba ami hakarak ami-nia oan ne’e di’ak. Ami pasiénsia tanba hakarak tratamentu di’ak ba ami-nia oan, maibé tanbasá to’o agora seidauk iha resposta. Ami la satifas ho atendimentu ida-ne’e. Nu’udar familia sente la satifás ho sistema saúde Timor nian ne’ebé la’o tarde demais. Governu presiza hadi’a sistema saúde ne’ebé daudaun ne’e la’o iha ita-nia rai ne’e tanba situasaun ida-ne’e daudaun ami hasoru ba ami-nia oan nia moras ne’e grave no emerjénsia ne’ebé presija tebes atu hadi’a,” nia husu.
Nia hateten, família konfirma beibeik ona ho parte saúde maibé sira husu atu família pasíensia hodi hein rezultadu tanba dokumentu ba pasiente refere atu halo transferénsia ba Malázia ne’e Ministra Saúde asina ona.
” Ami ba beibeik konfirma iha sira maibé dehan pasiénsia hein de’it tanba Ministra aprova ona hein hospital ne’ebé pasiente atu ba konsulta ne’e seidauk iha resposta, tanba ne’e husu atu ami pasiénsia. Ami husu bele buka dalan seluk atu ba fali ospitál seluk ka lae maibé sira dehan Governu Timor-Leste halo ona akordu ho Governu Malázia no ospitál KPJ Malázia, entaun ita labele muda fali ba fatin seluk só bele pasiénsia hodi hein,” nia hateten.
Hatán ba kestaun ne’e, Diretóra Nasionál Apoiu Servisu Hospitálar iha Ministériu Saúde, Santina Gomes, hateten Ministériu Saúde halo ona aprovasaun iha fulan kotuk maibé seidauk hetan konfirmasaun husi ospitál iha rai-li’ur ne’ebé pasiente atu ba halo tratamentu ne’e.
“Aprovasaun husi Ministra ne’e fulan kotuk liu ba, maibé ospitál mak seidauk fó komfirmasaun atu pasiente ne’e sai,” Diretóra Santina esplika.
Nia informa, Ministériu Saúde buka hela meu oinsá nune’e bele haruka pasiente ne’e ba ospitál Malázia iha semana ida-ne’e nia laran.
Jornalista : Felicidade Ximenes
Editór : Cancio Ximenes
