Janeiru-Juñu 2026: Governu transfere pasiente 208 ba rai-li’ur
DILI, 11 Agostu 2026 (TATOLI)–Diretora Nasionál Apoiu Servisu Hospitálar iha Ministériu Saúde, Santina Gomes, informa husi Janeiru to’o Juñu 2026 ne’e Governu transfere pasiente halo tratamentu iha ospitál rai-li’ur hamutuk 208.
“Lista pasiente ne’ebé enkamiña husi junta médiku ne’e totál hamutuk 350 itál, maibé Ministra Saúde foin aprova 208 no pasiente ne’ebé transfere ona ba rai-li’ur hamutuk 130,” Santina Gomes dehan ba jornalista sira iha nia kna’ar fatin, Kaikoli, ohin.
Husi pasiente 350 ne’e enkamiña husi junta médiku mai, maibé 208 mak hetan ona aprovasaun maibé hospitál balun seidauk konfirma katak pasiente bainhira mak sai. Pasoente hamutuk 130 mak MS transfere ba rai-li’ur tiha ona no balun rekupera no mai fali ne’e iha ema 30. Agora hein konfirmasaun husi ospitál atu transfere ba tan no ida 46 ne’e foin mak atu halo apontamentu ho ospitál, nune’e bainhira mak sira simu pasiente ne’e atu bele transfere sira ba.
“Pasiente sira-ne’ebé ita transfere ba rai-li’ur maioria moras kankru no moras fuan. Tanba moras ne’ebé ita transfere ba rai-li’ur no ospital ne’ebé Governu Timor-Leste halo kooperasaun ba ne’e mak iha Singapura no Malázia,” nia haktuir.
Diretora ne’e hateten, bainhira sira hetan lista pasiente husi junta médiku hafoin sira trata dokumentu pasiente nian no hotu mak submete ba iha Ministra Saúde hodi foti desizaun.
“Bainhira sira enkamiña pasiente mai Diresaun Nasionál Apoiu Servisu Hospitalár mak ami prepara dokumentu, ami halo pedidu orsamentu, pedidu aprovasaun. Bainhira iha aprovasaun ona, ami tenke halo apontamentu ba ospital ne’ebé mak ita atu transfere pasiente ba. Depois ita prosesu billete ba pasiente sira, ramata hotu dokumentu sira-ne’e, ami submete ba iha Ministra Saúde atu hetan aprovasaun ikus,” nia dehan.
Jornalista : Felicidade Ximenes
Editór : Cancio Ximenes
