KAK submete ba MP kazu kargu xefia ida uza kupaun Estadu
DILI, 11 Agostu 2026 (TATOLI) – Komisaun Anti-Korrupsaun (KAK) submete ona ba Ministériu Públiku (MP) kazu ne’ebé envolve kargu xefia ida ho inisiál JMdS tanba uza kupaun Estadu hodi enxe mina ba karreta privadu.
“Prosesu ne’e ami entrega ona ba Ministériu Públiku, prokuradór titulár sira mak iha responsabilidade atu prosesa ba oin”, Komisáriu KAK, Rui Pereira dos Santos, hatete iha Timor Plaza, ohin.
Nia dehan komisaun prontu bainhira MP delega tun fali kazu ne’e hodi finaliza prosesu tuirmai. Tanba ne’e krime pekulatu uzu ne’ebé utiliza kupaun mina ba interese partikulár.
Iha loron 20 Jullu, KAK liuhusi Unidade Informasaun no Seguransa (UIS) hala’o operasaun flagrante delitu iha área Komoro no detein funsionáriu públiku ne’ebé asume knaar nu’udar Xefe Departamentu Patrimóniu iha ministériu ida.
Tanba deskonfia komete krime pekulatu uzu liuhusi asaun utilza seña kombustivel Governu ba iha karreta privadu iha estasaun kombustivel Aitula Fuel Komoro, Dili.
Hafoin investigadór KAK halo prosesu identifikasaun, deside hodi halo detensaun ba suspeitu durante oras 72 iha sela KAK nian, iha Faról, tanba hahalok ne’ebé komete husi suspeitu prienxe elementu krime ba pekulatu uzu tuir artigu 83 Lei nú. 7/2020 kona-ba Medida Prevensaun no Kombate Korrupsaun (MPCC, sigla portugés).
Nune’e, KAK iha loron 23 Jullu prepara aktu prosesuál hodi entrega ba Ministériu Públiku no kontinua ba prosesu interrogatóriu dahuluk iha Tribunál Judisiál Primeira Instánsia Dili no tribunál aplika medida aprezentasaun periódika ba arguidu kada semana ba aprezenta-an iha estasaun polísia ne’ebé besik liu hodi koopera ba prosesu investigasaun.
Notísia relevante: http://CAC detein kargu xefia ida uza kupon Estadu ense mina ba karreta privadu
Jornalista: Nelson de Sousa
Editora: Maria Auxiliadora
