KAK-UNODC realiza formasaun kona-ba anti-korrupsaun ba formadu 35
DILI, 11 Agostu 2026 (TATOLI)-Komisaun Anti-Korrupsaun (KAK) serbisu hamutuk ho United Nations Office on Drugs and Crime (UNODC), liuhusi apoiu Governu Estadu Unidu Amérika (EUA) organiza formasaun anti-korrupsaun kona-ba prevensaun, investigasaun no prosekusaun korrupsaun ba formadu na’in-35 husi instituisaun oioin.
Formandu sira ne’e mai husi KAK, Kámara Konta, Defensoria Públika, Polísia Nasionál Timor-Leste (PNTL), Polísia Sientífika no Investigasaun Kriminál (PSIK) Inspesaun-Jerál Estadu, Unidade Informasaun Finanseira (UIF), Autoridade Tributária, Autoridade Aduaneira no seluk tan. Formasaun ne’e realiza entre loron 11 no 13 fulan-Agostu iha salaun Maubara Room, Timor-Plaza.
Iha abertura, Komisáriu KAK, Rui Pereira dos Santos, hatete korrupsaun kontinua sai hanesan obstákulu boot ida ba boa governasaun, dezenvolvimentu ekonómiku no konfiansa públika iha Timor-Leste. Korrupsaun hadau Estadu Direitu, hasai osan ba fatin seluk ne’ebé povu, liuliu presiza no enfrakese konfiansa ba instituisaun públika sira.
Tuir nia, atu kombate ho di’ak, la sufisiente de’it ho intensaun di’ak, presiza mós investigadór sira ne’ebé maka’as, promotór públiku sira ne’ebé kapa’as no koordenasaun forte entre instituisaun hotu ne’ebé responsabiliza atu deteta, investiga, no prosege krime sira ne’e.
“Formasaun ida-ne’e importante tebes. Iha investigadór, promotór públiku, auditór no reprezentante sira husi ita-nia instituisaun justisa no supervizaun sei hamutuk atu reforsa abilidade prátika iha investigasaun finanseira, jestaun ba evidénsia, no dezenvolvimentu kazu. Ita sei serbisu ho kazu reál no kompleksu hanesan ekipa ida, la’ós serbisu mesak”, nia hato’o.
Dirijente ne’e agradese ba UNODC nia apoiu tékniku no kooperasaun ne’ebé besik iha organizasaun programa ida-ne’e.
Nia hein katak, programa formasaun konjunta ne’e foin hala’o dahuluk
ho apoiu ne’e no sei kontinua faze tuirmai. “Formasaun ida-ne’e hatudu forte husi parseiru entre ita-nia instituisaun rua, no ami agradese tebes ba UNODC nia kompromisu ne’ebé nafatin akompaña Timor-Leste hodi harii kapasidade nasionál sustentavel atu kombate korrupsaun tuir Konvensaun Nasaun Unida hasoru Korrupsaun”, dehan.
Nia agradese mós ba EUA liuhusi nia embaixada iha Dili ninia apoiu valiozu ba reforsa Estadu direitu no esforsu anti-korrupsaun iha Timor-Leste.
“Parseiru hanesan ne’e importante tebes, atu ajuda ami harii kapasidade institusionál ne’ebé presiza atu kombate korrupsaun ho efetivu”, katak.
Hodi hato’o apresiasaun mós ba instituisaun hotu ne’ebé partisipa iha atividade ne’e ho nia kompromisu atu serbisu hamutuk.
Tuir nia, korrupsaun la’ós serbisu husi instituisaun ida de’it, maibé husi esforsu koordenadu no multidisiplinár hanesan ne’e mak bele taka lakuna hodi deteta, investiga no prosedimentu ne’ebé susesu.
“Ha’u enkoraja partisipante sira hotu atu partisipa ativa iha loron sira tuirmai ho produtivu no susesu, atu husu pergunta no uza oportunidade ida-ne’e hodi la’ós de’it dezenvolve abilidade téknika, maibé mós hodi hadi’a relasaun serbisu ne’ebé forte ho kolega sira husi instituisaun seluk”, katak.
Jornalista: Nelson de Sousa
Editora: Maria Auxiliadora
