PTR lansa fatuk-inan dahuluk ba konstrusaun edifísiu Tribunál Judisiál Primeira Instánsia iha  Vikeke   

VIKEKE, 11 Agostu 2026 (TATOLI)—Prezidente Tribunál Rekursu (PTR), Afonso Carmona, hamutuk ho Autoridade Munisípiu Vikeke lansa fatuk-inan dahuluk ba edifísiu  Tribunál Judisiál Primeiru Instánsia (TJPI) no rezidénsia ba juís sira iha Aldeia Lamak-Laran, Suku Karaubalu,  Postu Vikeke Vila.

Iha lansamentu ne’e, Afonso Carmona, hateten konstrusaun edifísiu Tribunál Primeira Instánsia ida-ne’e sai símbolu ida ba kompromisiu Estadu Timor Leste nian, atu hametin Estadu Direitu, asesu justisa no independénsia sistema judisiáriu tanba Tribunál  mak pilár importante ida iha Estadu Demokrátiku, sidadaun sira presiza protesaun ba sira-nia direitu siguransa jurídika, justisa ne’ebé justu no imparsiál.

“Tan ne’e, konstrusaun edifísiu Tribunál Primeira Instánsia Munisípiu Vikeke sai importánsia boot ba komunidade iha Vikeke ho infraestura ne’ebé apropriada no digna. Ita bele hadi’a tan servisu judisiál no kondiasaun di’ak liután ba juís no funsionáriu judisiáriu sira atu hala’o sira-nia servisu,” Afonso Carmona hateten iha serimónia lansamentu, Tersa ne’e.

Carmona espera katak Tribunál Judisiál Primeira Instánsia iha Munisípiu Vikeke  sei sai fatin ida ne’ebé povu sei sente hetan respeitu, protesaun no justisa ne’ebé independente.

“Tribunál tenke sai instuisaun ida-ne’ebé serbí indepedente no ema hotu simu tratamentu ho dignu, la haree ba pozisaun sosiál, kondisaun ekonómika no estatutu. Tanba konfiansa povu ba sistema justisa labele hari de’it edifísiu furak, maibé haree liubá desizaun justa no transparente, juís ne’ebé independente, servisu ho profesionál. Tan ne’e, liuhusi konstrusaun trubunál judisiáriu ida-ne’e atu hakbesik an ba povu, tanba ne’e ha’u husu empreza responsavel ba konstrusaun ida-ne’e tenke servisu ho responsablidade no garante kualidade, konklui tuir prazu ne’ebé iha kontratu,” nia hato’o.

Iha fatin hanesan, Prezidente Autoridade Munisípiu Vikeke,   Francisco C. S. de G. Soares, tenik lansamentu fatuk dahuluk ba konstrusaun edifísiu Tribunál Judisiál Primeira Instánsia Vikeke  no  rezidénsia ba juís sira sai símbolu importante hodi hametin Estadu Direitu.

“Konstrusaun edifísiu Tribunál Judisiál Primeira Instánsia iha Munisípiu Vikeke  la’os de’it sinál hahú konstrusaun edifísiu foun, maibé nu’udár símbolu importante hametin Estadu Direitu, asesu ba justisa no konsolidasaun instituisaun judisiál iha nivel lokál. Ami konsidera katak prezensa TJPI iha Munisípiu Vikeke sei fó benefisiu boot ba ami-nia povu tanba sidadaun sira bele asesu ba servisu justisa ho fásil liután, besik liután no ambiente ne’ebé apropiadu,” nia informa.

Projetu    konstrusaun edifísiu Tribunál Judisiál no Rezidénsia ba Juís  iha Postu Vikeke Vila  implementa husi kompañia Bonavide Unipessoal, Lda, ho Nú Kontratu TENDER/24/TR-2025, durasaun tempu tinan (1) ho orsamentu ba projetu ne’e hamutuk $4.140.329,38.

Partisipa iha lansamentu edifísiu TJPI ne’e kompostu husi reprezetante husi Ministériu Planeamentu  no Investimentu Estratéjiku (MPIE), Juís Sekretáriu Konselhu Superiór Majistratura Judisiál no Membru Konsellu Superiór, Meritisímu Juís Administradór Baukau, Sekretáriu Munisipál, Asesór, Diretór Servisu Munisipál no Delegasaun Territoriál, Komandante Polísia Nasionál Timor Leste (PNTL) Munisípiu Vikeke, Padre Parókia Vikeke, Xefe Suku Karaubalu, Reprezentante Diretór Ezekutivu Ajénsia Dezenvolvimentu Nasionál, Institutu Públiku (ADN, I.P.), reprezentante Diretór Nasionál Laboratóriu husi Ministériu Obra Públika (MOP) no komunidade.

Jornalista: Vitorino Lopes da Costa

Editór: Xisto Freitas da Piedade