Xanana husu joven sira lee livru atu aumenta koñesimentu
DILI, 11 Agostu 2026 (TATOLI)–Primeiru-Ministru, Kay Rala Xanana Gusmão, husu ba juventude sira atu kontinua lee livru hodi aumenta koñesimentu.
Primeiru-Ministru, Kay Rala Xanana Gusmão, hato’o kestaun ne’e iha serimónia lansamentu livru rua ne’ebé hakerek husi eskritór Martinho Borromeu ho titúlu “Entre Pensar, Dizer e Agir Uma Hermeneutica do Legado Vibo de Kay Rala Xanana Para o Futuru de timor-Leste no Etika Penderitaan, Memori dan Harapan Kay Rala Xanana Gusmão, Simeone Weil dan Rekonstruksi Moral Timor-Leste”, iha Auditóriu Semináriu Balide, Dili.
Xege Governu hato’o apresiasaun eskritór ne’ebé hakerek livru bazeia ba interpretasaun istória ho polítika filozófia no étika.
“Ha’u mai la’ós tamba obra ne’e hakarak ha’u-nia naran no imajen ne’e la’e maibé tanba ninia leitura kapaas tebes,” Primeiru-Ministru, Kay Rala Xanana Gusmão, hateten iha serimónia lansamentu livru rua hotitulu PM Xanana relata iha salaun SENOFA Balide, ohin.
Konteúdu husi livru ne’e, tuir nia, nia komprende kona-ba termu filozófia ne’ebé importante tebes tanba bele halo ema-nia hanoin ne’e bele la’o, nune’e joven sira presiza lee livru ida-ne’e hodi lee ninia konteúdu la’ós haree ba livru nia figura.
“Labarik sira tenke lee livru hirak-ne’e la’ós haree ba ha’u-nia naran ka imajen. Maibé, ha’u gosta no apresia tebes ba livru rua ne’e, maibé se furak liu bainhira hasai tiha naran Kay Rala Xanana Gusmão, tanba funu ne’e partisipasaun ema hotu nian,” nia dehan.
Tanba ne’e, Xanana husu ba joven sira atu kontinua lee livru barak atu aumenta koñesimentu, la’ós garante de’it ba Google, tanba dalaruma bele estraga imi-nia matenek ne’ebé mai ho naturalmente.
Eskritór livru, Martinho Borromeu, hateten konteúdu husi livru ne’e hakerek kona-ba istória Kay Rala Xanana Gusmão nian iha tempu rezisténsia no halo interpretasaun liuhus siénsia filozofia no étika ba akontesimentu ne’ebé liu tha ona.
“Ha’u hili Primeiru-Ministru, Kay Rala Xanana Gusmão ba alvu iha livru ne’e tanba ha’u lee istória Timor no ita hotu0hotu rona ninia istória, Ha’u mós bele hakerek tan líder rezisténsia sira seluk,” nia esplika.
Livru ne’ebé nia hakerek kompostu mós husi hanoin péritu internasionál sira seluk no iha ninia versaun tolu mak lian indonézia, inglés no portugés, no livru ne’e nia sei la faan maibé sei prezerva iha muzéu rezisténsia no iha biblioteka Xanana Reading Room iha Lecidere.
“Livru ne’ebé ha’u hakerek ho durasaun tempu tinan rua-resin. Gasts ba orsamentu, ha’u uza saláriu rasik mak uza hodi prodús livru iha Indonézia ho kuantidade livru hamutuk 90,” nia informa.
Jornalista : Alexandra da Costa
Editór : Cancio Ximenes
