Governu nomea Élviro Fernandes-Odete Maria Belo nu’udar membru ba CNE
DILI, 12 Agostu 2026 (TATOLI)—Governu liuhusi desizaun Konsellu Ministru nomea Élviro Fernandes Moniz nu’udar membru efetivu no Odete Maria Belo nu’udar suplente ba membru Komisaun Nasionál Eleisaun ho periodu 2026 to’o 2031.
Proposta ne’e aprezenta husi Ministru Administrasaun Estatál, Tomás do Rosário Cabral, kona-ba rezolusaun Governu ba nomeasaun membru ida husi Governu no ninia suplente ba Komisaun Nasionál Eleisaun.
Tuir proposta ne’ebé Ministru Administrasaun Estatál, Tomás do Rosário Cabral, hateten nomeasaun ne’e akontese tanba mandatu membru atuál Komisaun Nasionál Eleisaun sei remata iha loron 16 Agostu 2026, no hala’o tuir Lei nú. 5/2006, loron 28 fulan-dezembru, ho nia redasaun atuál, ne’ebé fó kompeténsia ba Governu atu nomeia membru hitu husi Komisaun ne’e nian ida, inklui mós pelumenus suplente ida.
“Nune’e ba mandatu foun ne’e ho durasaun husi tinan 2026 to’o 2031, Governu nomeia Élviro Fernandes Moniz nu’udar membru efetivu no Odete Maria Belo nu’udar suplente,” Ministru Administrasaun Estatál, Tomás do Rosário Cabral, hatete ba jornalista sira iha Palásiu Governu, ohin.
Enkuantu Élviro Fernandes Moniz rekoñesidu ho ninia idoneidade no esperiénsia iha área administrasaun eleitorál, ne’ebé daudaun ne’e hala’o funsaun lideransa iha Sekretariadu Tékniku Administrasaun Eleitorál.
Membru suplente Odete Maria Belo mós rekoñesida ho ninia idoneidade no esperiénsia iha área eleitorál, ne’ebé hala’o ona funsaun nu’udar membru Komisaun Nasionál Eleisaun durante tinan barak.
“Aleinde sira na’in-rua la hala’o responsabilidade diresaun iha partidu polítiku ka iha kandidatura eleitorál ruma,” nia dehan.
Nune’e, nia dehan, ho nomeasaun ne’e Governu asegura kontinuidade no funsionamentu regulár Komisaun Nasionál Eleisaun ba mandatu foun, hodi kontribui ba reforsu independénsia, kredibilidade no efikásia supervizaun nian iha prosesu eleitorál sira iha Timor-Leste, tuir kuadru konstitusionál no legál ne’ebé vigora.
Iha oportunidade ne’e, tuir membru efetivu CNRT, Élviro Fernandes Moniz, hato’o ninia apresiasaun no agradesimentu ba Governu Konstitusional da-sia (IX) ba konfiansa nebe’e atribui ba nia liuhusi rezolusaun Governu hodi nomeia nia nu’udar Membru Komisaun Nasionál Eleisaun Timor-Leste ba Periodu 2026 ate 2031.
“Nomeasaun ida-ne’e mós nu’udar responsabilidade, nune’e ha’u sei hala’o misaun foun ida-ne’e ho ha’u-nia kbi’it tomak hodi asegura aktu eleitorál tomak ne’ebé livre, justu, transparante no demokrátiku,” nia dehan.
Jornalista : Alexandra da Costa
Editór : Cancio Ximenes
