Governu Thailándia apoiu orsamentu rihun $3-resin ba Fundasaun Alola, empodera ekonomia feto iha TL
DILI, 11 Agostu 2026 (TATOLI)—Governu Thailándia liuhusi Embaixadór Thailándia iha Timor-Leste (TL), oferese apoiu fundu ho montante $3.100 ba Fundasaun Alola hodi apoiu programa kapasitasaun no empoderamentu ekonómiku feto no labarik sira-nian iha Timor-Leste.
Embaixadór Thailándia ba Timor-Leste, Atipat Rojanapaibulya, hateten asisténsia husi Embaixada Thailándia nia ba Fundasaun Alola hahú kedan husi tinan 2012 to’o mai agora.
“Asisténsia Embaixada Thailándia nia ba Fundasaun Alola ne’e atu hametin seguransa umana no promove empoderamentu feto no labarik sira iha Timor-Leste,” nia dehan ba jornalista sira iha Embaixada Thailándia, Faról, Tersa ne’e.
Nia hatutan asisténsia referida sei fó ba grupu vulneravel sira atu dezenvolve no aumenta rendimentu ba artezaun sira no sira-nia família.
“Ita haree Timor-Leste sai ona membru ba ASEAN, tanba ne’e ita labele husik membru ida iha kotuk. Ita tenke ajuda membru sira-ne’e atu ita la’o hamutuk bá-oin,” nia dehan.
Atipat hatutan apoiu ne’e mós atu hametin liután relasaun entre povu Timor-Leste no povu Thailándia nian.
Entretantu, Diretora Ezekutiva Fundasaun Alola, Maria Imaculada Guterres, hato’o agradesimentu ba apoiu kontínuu husi Embaixada Thailándia nian ba Fundasaun Alola iha programa kapasitasaun no empoderamentu ekonómiku feto.
“Ida-ne’e la’ós ba dahuluk maibé ida-ne’e kada tinan husi Embaixada Thailándia sempre fó apoiu ba ami atu suporta grupu feto sira-ne’ebé ami harii liuliu haree ba kbiit ekonomia feto nian,” nia tenik.
Nia afirma kontribuisaun ne’e sei uza atu harii kapasitasaun ba grupu artezaun sira liuhusi meiu hadi’a kualidade produtu no diversifikasaun produtu sira, hanesan mós ho aumeta sira-nia meiu asesu ba merkadu liuhusi partisipasaun iha Fundasaun nia feira metade tinan no feira natál nian.
“Apoiu ne’e mós sei suporta Fundasaun Alola atu fó espasu ba ita-nia inan soru-na’in sira no artezenatu sira, atu mai partisipa feira ne’ebé Fundasaun Alola halo kada tinan dala rua, iha tempu páskua no natál nian,” Atipat informa.
Dirijente ne’e akresenta feira referida sei tulun inan soru-na’in sira, atu hetan rendimentu hodi apoiu ba edukasaun oan sira-nian.
Kona-ba montante orsamentu, nia dehan, embaixada Thailándia apoiu orsamentu hamutuk $3.100 ba grupu 43 ne’ebé Fundasaun Alola estabelese ona.
Dezde 2003 Fundasaun Alola harri grupu soru-tais sira reprezenta munisipiu hotu, ne’ebé durante ne’e ativu iha kapasitasaun sira liuliu ba kualidade produtu, ospitalidade no mós kona-ba diversifikasaun produtu ne’ebé sira halo.
Enkuantu, nia esklarese orsamentu referidu la’ós atu fahe ba grupu, maibé atu apoiu ba formasaun sira no organiza feira artezenatu.
“Besik ona natál, tanba ne’e ami sei realiza feira iha semana dahuluk fulan-Dezembru, tanba baibain ita-nia bainaka sira mai husi rai-li’ur iha fulan ikus sira ba ona féria, entaun ita realiza feira atu ema mai hola hodi sai hanesan prezente ba sira-nia família,” nia subliña.
Jornalista: Osória Marques
Editór: Xisto Freitas da Piedade
