MAKLN-CCLN sei mobiliza kombatente kada munisípiu partisipa iha Komemorasaun Loron FALINTIL ba da-51
DILI, 12 Agostu 2026 (TATOLI)—Ministériu Asuntu Kombatente Libertasaun Nasionál (MakLN) hamutuk ho Conselho dos Combatentes da Libertação Nacional (CCLN), sei mobiliza veteranu ema-na’in lima hosi kada munisípiu atu partisipa iha serimónia Komemorasaun Loron Forças Armadas da Libertação Nacional Timor-Leste (FALINTIL) ba da-51 (20 Agostu 1975-20 Agostu 2026).
Komemorasaun ne’e sei realiza iha foho Matebian hun, Aldeia Lir, Suku Abu, Postu Administrativu Kelikai, Munisípiu Baukau.
“Ami iha koordenasaun ho Ministériu Defeza, Ministériu Juventude no Desportu, Arte no Kultura tanba iha relasaun ho kultura, sei mobiliza kombatente sira bá iha ne’ebá hodi halo reflesaun ida kona-bá ezisténsia baze-de-apoiu no baze-de-apoiu rahun,” Ministru Asuntu Kombatente Libertasaun Nasionál, Gil da Costa Monteiro “Oan Soru”, informa ba TATOLI iha kna’ar fatin, Komoro-Dili, Tersa (11/08).
Nia esplika veteranu sira-ne’e sei reprezenta hosi munisípiu hotu-hotu, no sira-nia prezensa iha loron komemorasaun ne’e mak atubele partilla hanoin ruma ba-malu, liuliu kona-bá setór neen (6) iha baze apoiu nian mak hanesan Setór Sentru Norte, Fronteira Norte, Sentru Súl, Fronteira Súl, Sentru Leste, no Ponta Leste.
“Hanesan relembra pasada ne’ebé mak difísil tebetebes, atu partilla informasaun ba malu, hodi haklaken tutan bá jerasaun sira,” Oan Soru tenik.
Jornalista: Osória Marques
Editór: Xisto Freitas da Piedade
