MF halo negosia ho Banku Mundiál finansia projetu abastesimentu bee-moos iha Baukau
DILI, 12 Agostu 2026 (TATOLI)—Governu liuhusi desizaun koletiva iha reuniaun Konsellu Ministru autoriza Ministra Finansa, Santina Cardoso, atu halo negosiasaun ho Banku Mundiál ba kontratasaun empréstimu ida liuhusi Asosiasaun Internasionál Dezenvolvimentu (IDA) ne’ebé destina ba finansiamentu projetu abastesimentu bee-moos iha kapitál Munisipál Baukau.
Tuir proposta husi Vise-Ministra Finansa, Regina de Jesus, hateten proposta ne’e deliberasaun ida kona-ba projetu ne’e moos ne’ebé sei prevene husi imprestímu nian ba Munisípiu Baukau.
“Entaun, ami husu atu Konsellu Ministru aprova ba projetu ne’e, nune’e Ministériu Finansa bele halo negosiasaun ba projetu refere,” Vise-Ministra ne’e informa ba jornalista sira iha Palásiu Governu, ohin.
Bazeia ba aprezentasaun husi Vise-Ministra Finansa katak projetu ne’e, integra iha faze daruak inisiativa rejionál Seguransa no reziliénsia ídriku Banku Mundiál nian, ho objetivu atu hasa’e asesu ba servisu abastesimentu bee ne’ebé jere ho seguru iha área selesionada sira iha Baukau, ne’ebé envolve konstrusaun no operasaun sistema sentralizadu ida-ne’ebé reziliente ba mudansa klimátika ho kapasidade atu benefisia besik ema 37.000 to’o tinan 2031.
Nune’e, nia dehan, ho finansiamentu ne’ebé prevee ho millaun $30, projetu ne’e inklui reabilitasaun no espansaun ba fonte no sistema bombajen ne’ebé iha, konstrusaun kaptasaun foun, estasaun bombajen, konduta, instalasaun tratamentu no armazenamentu, inklui mós instalasaun ba ligasaun doméstika besik 7.000 ho mikrometria.
“Inklui mós medida reforsu kapasidade institusionál no operasionál Bee Timor-Leste (BTL), liuhusi asisténsia téknika, dezenvolvimentu kapasidade no apoiu ba jestaun no manutensaun infraestrutura,” nia dehan.
Tanba ne’e nia dehan finansiamentu ne’e sei fó ho kondisaun altamente konsesionál, ho períodu karénsia tinan 10 no maturidade tinan 40, inklui mós opsaun adiamentu pagamentu iha situasaun emerjénsia nasionál relasiona ho eventu klimátiku.
Implementasaun ne’e sei lidera husi Ministériu Obra Públika, liuhusi Unidade Jestaun Projetu, no BTL mak sei responsabiliza ba operasaun no manutensaun infraestrutura hafoin ninia konluzsun.
Jornalista : Alexandra da Costa
Editór : Cancio Ximenes
