Ministériu Saúde Seidauk Submete lista rekrutamentu ba KFP
DILI, 12 Agostu 2026 (TATOLI)—Ministra Saúde, Elia dos Reis Amaral, hateten lista rekrutamentu ba pesoál saúde na’in-1.630 ne’ebé Ministériu Saúde prepara atu substitui funsionáriu sira-ne’ebé tama reformadu, seidauk submete ba Komisaun Funsaun Públika (KFP).
“Ita sei hadi’a uluk rekezitu balun molok lista rekrutamentu ne’e submete ba KFP,” Ministra Elia dos Reis informa ba jornalista sira iha Palaziu Governu,ohin.
Nia hateten, parte Ministériu Saúde no Hospital Nasionál Guido Valadares (HNGV) sei kompleta dokumentu ne’ebé presiza, molok halo aprovasaun atu submete lista ba KFP.
“Ha’u hanoin seidauk. Dalaruma ohin mak sira haruka mai tanba ami sei hadi’a fali buat balun, pájina rua ida seidauk kompleta. Ha’u hanoin Diretór HNGV kompleta ona, depois sei haruka mai no ha’u halo aprovasaun, depois sei hahú fó faze ida-ne’e,” Elia afirma.
Rekrutamentu ne’e relasiona ho implementasaun reforma obrigatóriu ne’ebé KFP anunsia iha 01 Janeiru 2026 tuir rezolusaun Governu. Ministériu Saúde identifika ona funsionáriu permanente na’in-100 ne’ebé sei tama iha reforma obrigatóriu.
Tanba ne’e, Ministériu Saúde deside atu loke konkursu públiku ba rekrutamentu pesoál saúde foun, ho objetivu atu substitui funsionáriu sira-ne’ebé tama ona iha reforma.
Antes ne’e, Diretora Nasionál Rekursu Umanu Ministériu Saúde, Marry Christavaria Lopes, esplika Ministériu Saúde planeia rekruta pesoál saúde hamutuk na’in-1.630.
O bjetivu halo rekrutamentu ne’e atu hametin tan sistema saúde no garante atendimentu ho kualidade ba pasiente sira, liuliu iha Hospitál Nasionál Guido Valadares, Hospitál referál, klinika no postu saúde sira iha TL.
Jornalista : Felicidade Ximenes
Editór : Cancio Ximenes
