MNEK aprezenta programa reuniaun ordinária CPLP-XXXI ba Konsellu Ministru
DILI, 12 Agostu 2026 (TATOLI)—Ministru Negósiu Estranjeiru no Kooperasaun, Bendito dos Santos Freitas, aprezenta programa kona-ba reuniaun ordinária XXXI Konsellu Ministru Komunidade País Lian Portugés nian (CPLP), ne’ebé sei realiza iha Dili iha loron 19 Agostu 2026, iha ámbitu Prezidénsia Pro Tempore Timor-Leste nian iha reuniaun Konsellu Ministru.
Reuniaun ne’e sei sai momentu importante ida hodi hakle’an koordenasaun (konsertasaun) polítiku-diplomátika no kooperasaun entre Estadu-Membru sira, ne’ebé aliña ho tema Prezidénsia timoroan nian, “Konsolidasaun Estadu Direitu Demokrátiku no Dezafiu sira CPLP nian”.
Tuir Sekretáriu Estadu Komunikasaun Sosiál, Expedito Dias Ximenes, hateten ohin MNEK aprezenta kona-ba planu realizasaun reuniaun ordinária Konsellu Ministru CPLP nian.
“Reuniaun Konsellu Ministru CPLP ne’e ho objetivu atu komemora tinan-30 istória ezisténsia CPLP, entaun tanba Timor-Leste agora daudaun asume prezidénte CPLP, lolós ne’e Giné Bissau mak lidera maibé tanba situasaun polítika entaun ita mak lidera fali,” Expedito Dias Ximenes relata ba jornalista sira iha Palásiu Governu, ohin.
Iha aprezentasaun MNEK aprezenta asuntu prinsipál sira iha ajenda mak situasaun iha Guiné-Bisau, preparasaun ba Prezidénsia CPLP tuirmai no definisaun ba orientasaun estratéjika Organizasaun nian ba tinan oin mai.
Enkuantu reuniaun ne’e mós sei diskute akordu administrativu ba aplikasaun konvensaun multilaterál seguransa sosiál CPLP, ne’ebé ho objetivu atu reforsa protesaun sosiál no portabilidade direitu seguransa sosiál sidadaun sira iha espasu Komunidade nian.
Aleinde ne’e, sei diskute mós deklarasaun kona-ba “Konsolidasaun Estadu Direitu Demokrátiku no Dezafiu sira CPLP nian”, ne’ebé reafirma kompromisu Estadu-Membru sira ho prinsípiu demokrátiku, Estadu Direitu no reforsu koordenasaun polítiku-diplomátika.
Jornalista : Alexandra da Costa
Editór : Cancio Ximenes
