MS aprezenta programa nasionál luta hasoru tuberkuloze-lepra-HIV/SIDA ba KM
DILI, 12 Agostu 2026 (TATOLI)—Ministra Saúde, Elia dos Reis Amaral, aprezenta ba Konsellu Ministru kona-ba implementasaun programa nasionál luta hasoru moras tuberkuloze, lepra no HIV/SIDA iha Timor-Leste.
Ministra Saúde, Elia dos Reis Amaral, hateten aprezentasaun ne’e inklui mós rezultadu prinsipál ne’ebé alkansa ona, dezafiu sira-ne’ebé identifika no prioridade intervensaun sira ba reforsu prevensaun, diagnóstiku, tratamentu no akompañamentu ba ema sira-ne’ebé afetadu husi moras sira-ne’e.
“Ohin, ita atualiza de’it kona-ba situasaun atuál iha ita-nia rain, atu nune’e Governu tau prioridade ba orsamentu no kompromisu globál saúde públika liuliu moras tuberkuloze, lepra no mó ba iha HIV/SIDA,” nia dehan.
Ministra dehan, esforsu ne’ebé Governu iha mak atu halo prevensaun no mós Testamentu másimu ba pasiente sira-ne’ebé mak halai sai husi tratamentu, entaun prioriza liu atu kontrola pasiente sira-ne’ebé konsumu ai-moruk tuberkuloze to’o fulan neen.
Nune’e, nia dehan, aprezentasaun ne’e permite mós atu analiza medida sira-ne’ebé la’o hela hodi reforsa resposta nasionál liuliu liuhusi hadi’a asesu ba servisu saúde, diagnóstiku no tratamentu ne’ebé lalais, vijilánsia epidemiolójika no sensibilizasaun komunidade sira.
“Entaun Governu reafirma importánsia kontinuidade no reforsu programa nasionál sira ne’e, ho objetivu atu hamenus insidénsia, impaktu moras sira ne’e no hadi’a saúde nune’e mós moris-di’ak populasaun nian,” nia dehan.
Jornalista : Alexandra da Costa
Editór : Cancio Ximenes
