MTA lansa portál hodi promove rekursu potensiál turizmu iha TL
DILI, 12 Agostu 2026 (TATOLI)—Ministériu Turizmu no Ambiente (MTA) lansa portál website modernizadu hodi promove rekursu potensiál setór turizmu iha Timor-Leste ba vizitante lokál no estranjeiru.
Diretór Jerál Turizmu no Ambiente, António da Silva, hateten website ne’e sira halo iha tinan 2027 maibé seidauk ninia informasaun sira seidauk kompletu, nune’e sira kontinua dezenvolve tan halo modernizadu ne’ebé bele integra atividade turizmu hotu iha laran atu ema hotu (vizitante) bele asesu ho lais no detallu.
“Husi website ne’e bele fasilita ita-nia vizitante sira-ne’ebé hakarak mai vizita ita-nia rai tanba konteúdu informasaun hotu ami integra iha website nia laran, entaun buat ne’ebé sira hakarak bele buka de’it iha website laran,” Diretór Jerál ne’e relata ba jornalista sira iha CCD, Kaikoli, ohin.
Aleinde ne’e, nia esplika mós katak website ida-ne’e sira mós integra Artifisiál Intelijénsia iha laran, atu nune’e bainhira vizitante estranjeiru sira hakarak planu ba viajen bele buka iha AI no sei mosu ita-nia informasaun sira-ne’ebé integra ona iha website laran.
“Website ida-ne’e mós sei la halo atividade komersiál tanba ne’e portál Governu nian, entaun customer sira-ne’ebé iha fatin estabelesimentu, turizmu komunitária, restsurante ruma bele halo rejistu iha MTA atu ami bele integra sira-nia fatin mós iha ita-nia website,” nia dehan.
Nia hatutan, konteúdu informasaun iha website nia laran sei integra kona-ba istória Timor nian, abitante, kultura, klima, destinasaun fatin turizmu, mapa lokalizasaun, ospitalidade, asesibilidade planu viajem (aviaun), oráriu viajen ho transporte terrestre, máritima no aero, lian, presu viajen, eventu internasionál, nasionál no lokál, Timor-Leste nia parséria dezenvolvimentu, publisidade iha plataforma oioin.
“Enkuantu ho website ne’ebé modernizadu sira mós garante ninia seguransa atu labele hetan hacker (estraga) husi sitiu sira seluk, tanba ne’e ita mós iha kolaborasaun servisu ho TIC Timor,” nia dehan.
Jornalista : Alexandra da Costa
Editór : Cancio Ximenes
