Progresu konstrusaun edifísiu Pediatria andar lima iha HNGV atinje ona 98%
DILI, 12 Agostu 2026 (TATOLI)—Ministra Saúde, Elia dos Reis Amaral, informa progresu kosntrusaun edifísiu pediatria andar lima iha Hospitál Nasionál Guido Valadares (HNGV) atinje on 98%.
“Ita-nia progresu konstrusaun edifísiu pediatria andar lima iha HNGV daudaun ne’e atinje ona 98% konstrusaun, agora daudaun faze ba instalasaun ekipamentu, tanba instalasaun ne’e la’ós loron ida ka rua maibé ne’e presiza tempu,” Ministra Elia dos Reis Amaral informa ba jornalista sira iha Palasiu Governu, ohin.
Governante ne’e esplika, ekipa sira daudaun ne’e halo ona instalasaun ba ekipamentu hanesan eletrisidade, bee-moos no sira seluk tan entaun sei garante ba tinan naruk.
“Tanba ne’e, ita hotu hein, tinan ne’e ita sei halo inaugurasaun ba edifísiu pediatria andar lima iha HNGV,” nia dehan.
Entertantu, konstrusaun edifisiu pediatria andar lima iha HNGV ne’e konstrui husi empreza China Civil Engineering Construction Corporation (CCECC) ne’ebé Governu Konstitusionál da-ualu (VIII) liuhusi Ministériu Saúde kontrata ho orsamentu hamutuk millaun $9,5.
Jornalista : Felicidade Ximenes
Editór : Cancio Ximenes
