Reuniaun téknika CPLP iha Dili diskute dokumentu 28 ba Konsellu Ministru
DILI, 12 Agostu 2026 (TATOLI) – Reuniaun grupu tékniku ministeriál Komunidade País Lian Portugés (CPLP), kuarta ne’e, iha Ministériu Negósiu Estranjeiru no Kooperasaun (MNEK) no reuniaun ne’e sei ramata iha loron 16 fulan-Agostu.
Reprezentante Misaun Permanente Timor-Leste ba CPLP iha Lisboa, Konselleiru Aviano Faria, hateten durante reuniaun ne’e, parte sira sei haree hamutuk dokumentu hamutuk 28 hodi aprezenta ba Konsellu Ministru, liuliu Timor-Leste aprezenta proposta rua importante kona-ba mobilidade no omenajen.
“Durante loron haat ne’e ami sei haree dokumentu hamutuk 28, mak komunikadu finál. Rezolusaun ne’e Timor-Leste mós hatama ida kona-ba mobilidade atu dezlokasaun movimentu sidadaun Estadu-membru sira ba-mai. Ho mós projetu omenajen ida espesífika ba loos ita-nia eis-Prezidente, eroi nasionál Francisco Guterres Lú Olo. Ida-ne’e ita hatama projetu omenajen ida ketak. Depois projetu omenajen ida mós hamutuk ho entidade sira seluk ne’ebé mak relevante, husi ne’e tama mós ho Pe. João Filgueira ho múzika ida-ne’ebé durante ita-nia luta nia kanta ba ita, naran Luis Represa,” Aviano hateten ba jornalista sira iha Dili.
Konselleiru ne’e haktuir, omenajen ne’e importante atu rekoñese kontribuisaun entidade sira ba kauza Timor-Leste nian.
“Ami aproveita momentu boot ida-ne’e atu omenajen sira hotu, husi kestaun polítika, maibé rekoñese mós ba entidade ne’ebé kontribui ba ita-nia kauza,” nia konklui.
Nia hateten, reuniaun ne’e atu haree no finaliza dokumentu hotu antes submete ba Konsellu Ministru CPLP.
“Reuniaun ida ohin ne’e, grupu tékniku ministeriál. Reuniaun ne’e sei ramata iha loron 16 fulan-agostu. Reuniaun ne’e mak atu haree dokumentu hotu, iha Konsellu Ministru mak bele deside finál,” nia dehan.
Nia esplika, iha loron haat nia laran parte sira sei diskute asuntu lubuk ida, inklui komunikadu finál no rezolusaun balun.
“Iha asuntu lubuk ida mak ohin ami haree. Asuntu sira-ne’e sei nakloke. Asuntu sira-ne’e iha mak komunikadu finál, rezolusaun lubuk ida. Ita fiar katak iha loron haat ne’e ita sei bele finaliza dokumentu sira ne’e atu submete ba Konsellu Ministru,” nia dehan.
Hafoin grupu tékniku, diskusaun sei kontinua iha nivel Embaixadór sira.
“Depois ne’e ita sei ba fali nivel ida Embaixadór sira mak atu haree, ne’e mós dokumentu lubuk ida,” nia dehan.
Partisipasaun másimu no proposta Timor-Leste, Aviano afirma katak nasaun membru CPLP sira partisipa másimu.
Nia dehan, São Tomé e Príncipe de’it mak partisipa liuhosi Zoom, no Giné Ekuatoriál la partisipa iha nivel tékniku tanba kestaun balun.
“Nasaun membru CPLP sira partisipa másimu. Só São Tomé e Príncipe de’it mak partisipa husi Zoom de’it. Giné Ekuatoriál mak la mai, dalaruma iha kestaun balun maibé sira de’it mak bele klarifika. Maibé só tékniku mak la partisipa. Nivel ministru sira konfirmadu hotu ona, sira sei partisipa ho sira nia delegasaun, maibé Guine Bisau mak la partisipa maibé ita hatene ona sira nia problema,” nia hateten.
Jornalista : Hortêncio Sanchez
Editór : Cancio Ximenes
