Uma-Kain 104 iha Suku Kampung Alor husu Governu aselera prosesu pagamentu indemnizasaun
DÍLI, 12 Agostu 2026 (TATOLI) – Porta-voz uma-kain 104 iha Suku Kamung Alor, Postu Administrativu Dom Aleixo, Munsípiu Díli, Edmundo Ximenes de Sá, husu Governu, liuhusi Sekretaria Estadu Terras no Propriedade (SETP), atu aselera prosesu pagamentu indemnizasaun hafoin governu halo despezu administrativu ba sira-nia hela fatin.
Uma-kain hirak-ne’e hetan despeju administrativu husi Sekretaria Estadu Asuntu Toponímia no Organizasaun Urbana (SEATOU) iha loron 1 Jullu, 2026.
“Ami husu Sekretáriu Estadu Terras no Propriedade favor aselera prosesu pagamentu ba ami uma-kain hamutuk 104 iha Aldeia 2 Hamahon, Suku Kampung Alor, ne’ebé Sekretaria Estadu Asuntu Toponímia no Organizasaun Urbana (SEATOU) halo ona despeju administrativu ba ami iha loron 1 Jullu,” Edmundo ba TATOLI iha Sede Suku Kampung Alor, Kuarta ne’e.
Nia deahn SETP haruka ona sira kompleta dokumentu nesesariu sira maibé to’o agora seidauk halo pagamentu.
“Uma-kain 104 sira submete ona dokumentu hotu, inklui kartaun eleitorál, konta bankária no dokumentu relevante sira seluk. Maibé, bainhira sira halo verifikasaun iha banku, osan indemnizasaun seidauk tama iha konta bankária,” Edmundo salienta.
Tuir nia, atrazu pagamentu ne’e afeta diretamente ba moris vítima eviksaun sira, tanba balu aluga uma ema seluk nian no balu muda ona ba munisípiu.
“Vitima sira maioria aluga ema nia uma, tanba ne’e husu ba Governu atu aselera prosesu pagamentu ba indemnizasaun hodi bele uza ba nesesidade loroloron,” nia dehan.
Iha fatin hanesan, Virgílio Marques nu’udar komunidade ida ne’ebé hetan despezu administrativu hateten Governu promete atu halo pagamentu iha loron 10 nia laran, maibé to’o agora osan seidauk tama iha konta bankária.
“Ami rekoñese rai ne’ebé ami hela ne’e pertense rai Estadu nian, bainhira Governu presiza ami fó, maibé tenke indemniza ba ami-nia uma ne’ebé ami konstrui iha rai Estadu nia leten. Atu ami bele uza ba buka fatin seluk hodi kontinua ami nia atividade moris loroloron nian,” Virgílio konklui.
Rai ne’ebé komunidade hela ba uluk durante okupasaun Indonézia utiliza hanesan Perumahan Perhubungan Laut. Hafoin Timor-Leste hetan independénsia, rai ne’e automatikamente sai propriedade Estadu.
Governu Timor-Leste sei entrega rai ne’e ba Governu Singapura atu uza ba harii Embaixada Singapura iha Timor-Leste.
Jornalista: Camilio de Sousa
Editór: Filomeno Martins
