Ezekusaun orsamentu kapitál dezenvolvimentu ba projetu 2603 atinje 29%

August 13, 2026
11:55 PM
Facebook Instagram X WhatsApp Telegram

Diresaun Rejionál Serbisu Obra Públika iha RAEOA, suspende provizória pagamentu ba empreza nasionál rua tanba ezekuta projetu reabilitasaun estrada rurál iha suku Usitasa’e liga suku Bobometo, no husi Bobometo sub-rejiaun Oésilo liga ba sub-rejiaun Pássabe laiha inspesaun finál no la kumpre dezeñu BoQ. Imajen TATOLI/Abílio Elo Nini

DILI, 13 Agostu 2026 (TATOLI)—Diretór Ezekutivu Ajénsia Dezenvolvimentu Nasionál, Januáriu Guterres, informa katak ezekusaun orsamentu kapitál dezenvolvimentu iha tinan 2026 atinje 29% ho orsamentu hamutuk $117.318.397,72.

“Ezekusaun ne’e kompostu husi kategória projetu neen ho totál projetu hamutuk 2603, hanesan fundu infraestrutura hamutuk 1485, kapitál dezenvolvimentu hamutuk 757, projetu dezenvolvimentu integradu munisipál (PDIM) hamutuk 263,” Diretór ADN relata iha salaun Delta Nova, ohin.

Dirijente ne’e hatutan kategória seluk tan mak fundu espesiál dezenvolvimentu RAEOA hamutuk 70, fundu espesiál dezenvolvimentu Ataúro hamutuk 12 no projetu husi subvensaun públika hamutuk 16.

Nia reforsa tan katak totál projetu ne’ebé hahú pagamentu ona iha tinan 2026 hamutuk 446 fundu infraestrutura hamutuk 188, kapitál dezenvolvimentu hamutuk 196, projetu dezenvolvimentu integradu munisipál (PDIM) hamutuk 49.

Kategória fundu espesiál dezenvolvimentu RAEOA hamutuk 13, fundu espesiál dezenvolvimentu Ataúro hamutuk lima (5) no projetu husi subvensaun públikas hamutuk 15.

Jornalista : Alexandra da Costa

Editór : Cancio Ximenes